KUSGANONG nibarug si BM Tommy Abapo kabahin sa pagpalit sa mga bag-ong sakyanan alang sa bise gobernador ug mga bokal.
“Purchasing of new vehicles is not mandatory but necessary and timely,” pamahayag pa ni Abapo atol sa pakighinabi sa mga sakop sa media.
Kahinumduman nga si BM Abapo, BM Lucille Lagunay, BM Jamie Aumentado-Villamor ug VGO Chief of Staff , Atty Glenn Rey Anino maoy mga resource persons sa programang Capitol Reports.
Sa niaging Sangguniang Panlalawigan, nisupak ang Senior Board Member kaniadto ug karon Bise Gob. Dionisio Victor A. Balite sa pagpamalit sa maong mga bag-ong sakyanan.
Kini gumikan kay daghan pa ang COVID-19 positive cases niadtong higayona. Dugang pa niini, nga isip bokal sa Tersiero Distrito mobotar man siya sa maong lakang kon uyon ba o supak.
Siya na ang bise gobernador karon, apil siya sa Majority Bloc sa Sangguniang Panlalawigan ug siya ang presiding officer.
Suma pa sa rules, ang Bise Gobernador igo lamang mo-break sa tie o kon dunay higayon nga magtabla.
Sa kasamtangang Sangguniang Panlalawigan, apil sa majority block mao sila VG Balite, BM Lagunay, BM Abapo, BM Aumentado-Villamor, Senior Board Member Tita V. Baja, BM Greg Jala, PCL Pres. BM Gloria Biwang-Gementiza ug Liga ng mga Barangay Pres. BM Romulo G. Cepedoza.
Tua sa minority bloc sila BM Benjie Arcamo, BM Aldner Damalerio, BM Mimi Boniel, BM Elpidio Bonita, BM Nathaniel Binlod ug SK Federated Pres. Christian Victor Bolos III.
“I’ve known VG Balite since then. He’s a good man and not corrupt” matud pa kang Abapo, kinsa maoy Chairman sa SP Committee on Peace and Order.
Dugang pa niya nga isip magbabalaud gikinahanglan nga dunay immersion nga himoon ngadto sa mga lungsod ug kabaryohan arun makakuha sila sa saktong datos ug ingon man sa pulso sa katawhan.
Mahitungod kini sa pagpanday nila sa mga sugyot balaudnon sa Sangguniang Panlalawigan. (Kahlil Lester O. Camba)
GIBANHAW
Ipadayon sa Sangguniang Panlalawigan (SP) sa Bohol ang duha ka tuig nang plano niini nga pagpalit og mga bag-ong pickup truck alang sa ilang mga miyembro nga una nang gihiklin human kini gisaway sa publiko human unang gipahibalo kaniadtong 2020 tungod sa dili tukma sa panahon human nagkagubot ang tanan tungod sa COVID-19 pandemic.
Matod ni Bise Gobernador Dionisio Victor Balite, karon na ang tukmang panahon nga ilisan ang halos dekada na nga mga service vehicle sa mga Bokal o SP tungod kay ang probinsya ug ang ubang bahin sa nasud nagsugod na sa pagbangon gikan sa krisis sa panglawas.
Si Balite, kansang buhatan maoy apil sa makadawat sa bag-ong mga sakyanan, niingon nga ang mga sakop sa SP nagkahiusa sa ilang pagtugot sa pagpamalit na.
“Ni ingon sila na palit ta og bag-o kay timely na ron, ug angayan na ta mo palit kay wala na man ta sa level three, naa na ta sa level one [COVID-19 alert level],” miingon si Balite.
Giklaro sa bise-gobernador nga ang SP mopalit sa Nissan Navarra pro-4X pickup trucks, nga mohaum sa specifications nga gitugot sa Department of Interior and Local Government (DILG).
“Ni submit og mga brochures ang mga car dealers Toyota, Ford, Nisaan, Isuzu ug Mitsubishi. So far, sa among tan-aw based sa specifications sa DILG, mao ra gyud ang Navarra sa Nissan,” matod ni Balite.
Ang SP mopalit og 14 ka unit sa sakyanan, usa sa matag usa sa 13 ka sakop sa SP ug kang Balite diin matag trak nagkantidad sa P1.4 milyones.
Ang giplano nga pagpalit sa SP sa mga service vehicle usa sa mga kontrobersiya sa panahon ni kanhi bise-gobernador Rene Relampagos ug sa legislative body kaniadtong 2021, tungod kay nag-atubang sila og kusog nga pagsupak gikan sa publiko batok sa pag-angkon tungod sa nagpadayon nga pag-us-os sa ekonomiya tungod sa hugot nga mga pagdili sa COVID-19.
Ang isyu naglambigit usab kang kanhi gobernador Art Yap kinsa unang mipirma sa hangyo alang sa pag-aprubar sa DILG alang sa pagpalit sa nakalabay nga tuig 2021.
Sa laing bahin, si Balite sa maong tuig 2021 usa lang sa duha ka sakop sa SP nga misupak sa maong lakang tungod sa pagkadili-panahon niini taliwala sa pagsira sa mga negosyo ug grabeng kahimtang sa ekonomiya sa probinsiya niadto.
Matod pa usab sa hepe sa DILG Bohol nga si Mr. Jerome Gonzales, gikinahanglan pa ang pagtugot sa ilang uluhang buhatan sa DILG aron makapadayon ang SP sa pagpalit.
Ang chief of staff ni Balite nga si Atty. Glenn Anino niklaro nga ang samang pagtugot nga gipagawas sa DILG sa miaging tuig maoy gamiton sa SP sa pagpalit. (RTB)
