NAKAPAGAWAS na ang Department of Social Welfare and Development sa Central Visayas (DSWD)-7 sa kinatibuk-ang P10,515,000 nga balor sa educational assistance ngadto sa 3,307 ka kabus nga mga tinun-an sa rehiyon.
Sa labing bag-o nga datos sa maong ahensya, nagpakita usab nga ang bulto sa kantidad o mokabat sa P5,442,000 napunta sa Probinsiya sa Sugbo nga nakabenepisyo sa kinatibuk-ang 1,650 ka mga tinun-an nga nagpalista sa elementarya, high school, ug kolehiyo o vocational.
Ang DSWD-7 niingon nga nagpagawas usab kini og kinatibuk-ang P3,565,000 ngadto sa 1,123 ka mga kabus nga estudyante sa Negros Oriental; P1,318,000 ngadto sa 467 ka mga tinun-an sa Bohol, ug P190,000 ngadto sa 67 ka mga tinun-an sa Siquijor.
Kahinumdoaman nga gisugdan sa ahensya ang pag-apod-apod sa tabang pinansyal niadtong Agosto 20.
Gihimo usab ang dugang hugna sa pag-apod apod niadtong Agosto 27 nga nagikan sa mga nag-apply online.
Ang educational assistance program ubos sa DSWD’s Assistance to Individuals in Crisis Situations (AICS), naghatag og financial aid sa mga kwalipikadong estudyante nga anaa sa krisis aron makabayad sa ilang galastohanan ug uban nila nga panginahanglan sa pagtungha.
Ubos sa programa, ang mga tinun-an sa elementarya mahimong makadawat og P1,000 matag usa; P 2,000 alang sa mga tinun-an sa junior high school; P3,000 sa senior high school, ug P4,000 sa kolehiyo o sa mga nagkuha og vocational courses. (RTB)
