GIDAYEG sa Committee on Public Utilities ang Franchises ang pagbutang sa Speed Limit Alarm System sa Southern Star Bus Transit Inc.
Kini human gipatawag ang maong bus company sa komitiba nga gipangulohan ni Board Member Aldner Damalerio.
Kahinumduman nga sa usa ka session sa Sangguniang Panlalawigan nga gipangulohan ni Bise Gob. Dionisio Victor A. Balite,Ph.D nihatag si Board Member Tommy Abapo sa iyang privilege speech kabahin sa sagunsong mga aksidente nga may kalabotan ang SSBT, Inc.
Ang speed limit naa lamang sa 70 kph apan kon molapas, ma-trigger ang LED alarm lakip na ang ilang buhatan.
Dunay CCTV usab nga gaatubang sa kalsada ug usa ang gaatubang sa mga pasahero.
Alang kini kon dunay imbestigasyon nga mga pagahimoon, sayon lamang ang pagsuta sa kon kinsa ang papanubagon o ang dunay sala.
Lakip sa rekomendasyon sa komitiba mao ang pagsumiter sa ilang report kaduha sa usa ka tuig alang sa dugang kasayuran sa katawhan.
Suma pa sa pamahayag ni SSBT,Inc legal counsel Atty. Marifel Lagare nga padayon ang drivers’ education nila apil na ang mga konduktor mahitungod sa safety measures ug uban pang mga pamalaod sa kadalanan.
Nakig-alayon sila sa PNP Highway Patrol Group ug sa accredited driving school sa Land Transportation Office (LTO).
Dugang pa niini, nisunod usab ang maong kompanya sa LTFRB Memorandum Circular 2015-021 mahitungod sa pagbutang sa Global Positioning System (GPS) sa tanan nilang mga bus units. (Kahlil Lester O. Camba)
