ANG isyu sa P24 milyones nga 14 ka sakyanan alang sa mga bokal ug bise-gobernador sa niaging administrasyon, naabli og balik sa administrasyong Aumentado-Balite.
Kahinumduman nga ang maong pagpamalit unta gisaway sa katawhang Bol-anon ilabina sa niaging tuig.
Ang punto sa katawhan nga nagkamang pa ang Bohol sa pandemya sa COVID-19 ug mas maayo nga gamiton ang maong kuwarta aron ikatabang sa katawhan.
Sa nakalabay nga administrasyon, si kanhi Senior Board Member ug karon Vice-Governor Dionisio Victor Balite, maoy pinaka-bokal nga nisupak nga mopalit ang Sangguniang Panlalawigan (SP) og mga sakyanan alang sa 13 ka bokal ug 1 ka bise-gobernador.
Ang maong pundo nga ipamalit sa 14 ka pick-up kaniadto pa’ng 2020 sa bulsa sa Kagamhanang Probinsyal.
Karon nga si Dionisio Victor Balite na ang Bise-Gobernador, mipabor na siya nga i-dayon na ang pagpamalit sa 14 ka Nissan Navarra pick-up, bitbit ang katarungan nga haum na kini sa sitwasyon kay nagka-us-os na ang mga kaso sa maong kagaw dinhi sa lalawigan.
Gikinahanglan na usab kuno ang maong sakyanan sa mga sakop sa SP kay “daan na kaayo ug dako ang maintenance na sa ilang mga sakyanan karon, ug ana-a gayuy mga bokal nga walay sakyanan”.
Ang Kagamhanang Probinsyal nihimo sa bidding kaniadtong Merkules, Agosto 31, matud ni Balite.
Apan kining lakang ni Balite gisumbalik sa iyang mga kritiko ug sa ubang netizens nga nagkanayon, “(Non-verbatim) Tua na lage. Siya ra man diay gusto og bag-ong sakyanan. Walay kalahian sa niaging administrasyon.”
Usa usab ka netizen niingon, “Unaha sa ug tabang ang mga Bol-anon kay lisod basta maoy modumot,” komento sa usa ka netizen sa Facebook post sa usa ka sakop sa media sa Bohol.
“Lisod pasabton ang mga tao ilabina daghan trahedya giagian ug wapa makabangon unya hisgot mo’g milyones for blah blah blah remember kung unsay nahitabo sa inyong kontra,” dugang pahinumdom sa maong netizen.
Mayorya kaniadto sa niaging administrasyon ang nipabor nga mopalit sa maong mga sakyanan. Ug karon gipaboran usab.
Ang beteranong magbabalaod nga si Board Member Atty. Tommy Abapo, Jr. niingon kabahin sa barog ni Balite nga mopalit na og mga sakyanan:
“Purchasing the vehicles is NOT MANDATORY, but NECESSARY and TIMELY.”
“I stand by VG Balite. He’s a good man and not corrupt,” dugang pamahayag ni Abapo sa gihimong Capitol Reports kaniadtong Biyernes, Septiyembre 02.
Ikaw, unsay imong ikasulti sa lakang ni Bise-Gobernador Balite, uyon o dili? Ug ngano?
Kon gamiton ang maong mga sakyanan sa ilang mga lakang-opisyal aron mapadali ang paghatud sa serbisyo-publiko, walay dautan niana.
Gawas na lang kon gamiton sa ilang personal nga lakaw. Kana maoy lahi na nga istorya.
Kining Lindog: ‘Tingog sa Kabatan-onan’, abli sa inyong mga suhestyon ug komento. Mamahimo kana ninyong ipadangat pinaagi niining numero: 09638753562 o mopadala sa inyong mensahe sa akong Facebook account/Messenger: ’Wilson Auguis Subrio’.
Modawat lamang og seryoso ug dili binuang. Daghang salamat! Pag-amping mga Bol-anon!!!
