WALAY kidnappings nga nahitabo sa bisan asang dapit sa lalawigan sa Bohol. Kini maoy pagklaro sa kapolisan human nikatap sa social media ang mga posts bahin sa giingong nahitabong kidnapping dili palang dugay.
Ang Bohol Provincial Police Office (BPPO) walay nadawat nga susamang report mao nga gusto nila karon pangitaon kun kinsa ang nagpakatap niini diha sa social media.
Ang kapulisan nisusi sa nikatap sa Facebook bahin sa giingong dunay gikidnap, apan walay kamatuoran human ang maong post gitangtang na.
Sumala pa ni Police Colonel Uzmundo Salibo, pangulo sa BPPO nga naghimo na sila karon og imbestigasyon ug nakigalayon sa ubang law enforcement agencies aron pangitaon kining nagpakatap sa maong walay kamatuoran nga impormasyon.
Hinuon, giawhag niya ang katawhan nga motaho gilayon sa mga otoridad kung duna gyud silay masaksihang pagpangidnap o kaha nakahibalo sila kung adunay kaila nga gikidnap aron ilang masusi.
Dugang sa BPPO nga recycled na ang mga hulagway nga gigamit sa matud pa kidnapping ug attempted kidnapping incidents nga gipakatap karon sa social media.
Nabantayan sab nila nga kalab-anan sa mga posts nga ilang gisusi managsama lang sa gipang share sa social media kaniadto pipila ka tuig na ang mga nilabay.
Giklaro ni Salibo nga walay gikataho ug verified kidnapping and attempted kidnapping nga panghitabo dinhi sa Bohol karon apan padayon sila nga naniid batok sa mga gustong maghimo niini. (RTB)
