SI Duero Mayor Al Taculad nipasalig nga pahugtan ang seguridad sa mga tunghaan taliwala sa mikatap nga taho nga dunay pagpangidnap sa ubang bahin sa Visayas.
Nagplano ang mayor nga mopakatap ug dugang enforcers duol sa mga tulonghaan sa ilang lungsod aron sa pagprotihir sa mga tinun-an nga mosulod ug gawas sa mga eskwelahan.
Sa exklusibong pakighinabi ni Mayor Taculad ning pamantalaan gitug-an niini nga modugang sila ug mga barangay tanods ug barangay peacemaking action team nga motabang ug bantay sa mga tunghaan.
Gipasalig hinoon sa mayor ngadto sa iyang mga konstituente nga pabilin nga luwas ang mga tinun-an sa ilang lungsod ug niawhag sa publiko nga dili magduha-duha sa pagtaho sa otoridad kung adunay kadudahan ug lihok nga ilang makit-an o bisan unsa nga mga insidente.
Ang kapolisan sa lungsod niapelar usab sa publiko nga dili mosabwag ug mga sayop ug unvalidated reports may kalabutan sa kidnapping incidents tungod kay dili kini makatabang ug makasamot hinoon sa kabalaka sa katawhan ilabi na sa mga ginikanan.
Ang kapolisan nipasalig nga wala pay insidente sa pagpangidnap nga natala dinhi sa bisag asang lugar sa Bohol. (RTB)
