GIPAPANUMPA ni Gobernador Aris Aumentado ang mga napili nga opisyales sa Bohol Muslim Community Peace Movement Incorporated sa gihimong Provincial Peace and Order Council (PPOC) meeting karong bag-o.
Gihimo ang pagpanumpa didto sa BPPO Multi Purpose hall dinhe sa dakbayan sa Tagbilaran.
Nanumpa ni Aumentado ang mga sakop sa Bohol Muslim Community Peace Movement Incorporated pinangulohan ni Taha Malabi, Presidente; Asnawi Matua, Bise Presidente; Florencio Reyes, Kalihim, Zafrulla Lim Jikiril, luyo-luyo nga kalihim; Acmad Maruhom, Mamahandi; Abdulsamad Pangompig, Auditor ug Amina Sacar, Book keeper.
Nanumpa sab sila si Nasrodin Cosain, Press Relations Officer (PRO) Bohol District I; Benjie Ali, PRO Bohol District II; Laarni Abbas, PRO Bohol District III; Abedin Macalayo, Board of Director (BOD) sa Darussalam Muslim Community; Dimakota Alangadi, BOD sa Islamic Center Muslim Community; Alim Panarigan, BOD sa Muslim Village Islamic Community; Mohaimen Macaumbos, BOD sa Tubigon Islamic Community; Basari Pariba, BOD, Ubay Islamic Community, Amalan Abbas, BOD, sa Alnasrie Islamic Community , Aliakbar Maruhom, BOD sa Norol Hidaya Islamic Community ug Jonas Ejoc, BOD sa GASAKA Dawa Center Islamic Community.
Ang lakang sa kagamhanang probinsyal nag-bukas og kahigayunan nga ang mga Muslim nga nia na nagpuyo dinhe sa Bohol dunay representasyon sa pangagamhanan ug dunay kalabotan sa pagpatunhay sa kahusay ug kalinaw dinhe sa lalawigan sa Bohol.
Ang Muslim community dinhe sa Bohol dunay representation sa Provincial Peace and Order Council. (RTB)
PPOC GITIGOM
Nipatawag na si Governor Aris Aumentado og tigom sa labing unang higayon sa Bohol Provincial Peace and Order Council (PPOC) didto sa Bohol Provincial Police Office (BPPO) multi-purpose hall dinhe sa Tagbilaran karong bag-o.
Si Aumentado mao ang chairman sa PPOC ang nangulo sa maong tigom uban ang iyang vice-chairman nga si Vice-Governor Dionisio Victor Balite ug gitambongan kini sa mga ahensiya nga sakop sa nahisgotang council.
Kini maoy labing unang higayon nga gitigom ni Aumentado ang PPOC ubos sa bag-ong administrasyon sa kagamhanang probinsyal nga siya ang mamunoan hangtod sa tuig 2025.
Si Aumentado ang ni-reconstitute na sa mga miembro sa PPOC pinaagi sa Executive Order No. 11 series of 2022.
Ang PPOC dunay mga special action committees nga motuki, motutok ug coordination sa mga isyu nga giatubang sa kahusay ug kalinaw dinhe sa Bohol.
Gilangkoban kini sa Anti-Insurgency, Anti-Criminality, Public Safety, Crisis Management and Peace and Order and Public Safety Technical Working Group.
Si Aumentado nangulo sa pagtuki sa diskusyon sa kahusay ug kalinaw sa Bohol diin nagreport ang PNP sa anti criminality, AFP sa insurgency ug PDEA sa illegal drugs update. (RTB)
