GIPAHIGAYON sa lungsod sa Buenavista kaniadtong Biyernes, Agosto 26, 2022 ang ground-breaking ceremony alang sa tukuron nga Regional Evacuation Center nga mokostar sa dul-an 33-milyones pesos.
Kini gitambungan nila ni Gov. Aris Aumentado, unang ginang sa Bohol ug 2nd district CongW. Vanessa Aumentado, ug ingon man ni Mayor Dave Duallo sa maong lungsod.
Sumala pa ni Capitol Senior Adviser for Strategic Investments Benjie ‘Bobong’ Sanchez-Oliva nga ang seremonya sa groundbreaking usa ka makapahingangha nga kahimtang pinaagi sa talagsaon nga pagka-manggihatagon sa gobyerno.
Sigon ni Oliva nga ang proyekto maoy kulminasyon sa kakugi sa RC Pasay Cyber City, Ph Cares-Pamayanang Handa nga gipangunahan sa pangulo niini Mr. Jun Passion, ug ni Gobernador Aris Aumentado.
Nagpasalamat usab si Oliva sa suporta ug panalangin sa DPWH ug labi na ni kanhi Presidente Rodrigo Duterte nga misuporta sa proyekto.
Gipasabot usab ni Oliva nga ang proyekto nagsilbi usab nga timaan sa pagpadayon sa mga mahinungdanong kalambuan sa Bohol ubos sa kasamtangang pamunuan ni Pres. Bong-Bong Marcos. (RTB)
