PADAYON nga gipalig-on sa mga dakbayan sa nasud ang Public-Private Partnership program labina sa siyudad sa Tagbilaran nga nakahatag og kalambuan sa dakbayan.
Si Mayor Jane Yap kinsa regional representative sa League of Cities of the Philippines (LCP) ang usa sa 146 ka mga sakop sa maong liga ang mitambong sa labing unang LCP National Convention gipangulohan ni Cebu City Mayor Michael Rama karong bag-o didto sa dakbayan sa Sugbo.
Sa maong LCP national convention, gihisgutan sa mga pribadong sektor ang mga pamaagi aron mapalig-on pa ang PPP program sa mga dakbayan sa nasud alang sa padayon nga kalambuan sa mga siyudad.
Lakip sa mga pribadong sektor nga mitambong sa maong konbensiyon mao ang MVP kon Manny V Pangilinan Group of Companies, Ayala, ug SM.
Matud ni Mayor Yap, nagpadayon usab ang lig-on nga katalian sa dakbayan sa Tagbilaran sa mga city mayors sa Sugbo ug sa silingang lalawigan sa Sugbo.
Nunot sa pagtinabangay sa mga mayor, lauman ang panag-igsoonay sa mga dakbayan.
Gipadayon sa pinakabata ug pinakaunang babaeng mayor sa dakbayan ang kabilin sa iyang bana nga si kanhi Mayor Baba Yap nga maoy iyang chief of staff karon, usa na niini ang mga proyektong tinambayayongan sa gobyerno ug pribadong sektor alang sa kaayohan sa mga Tagbilaranon. (RTB)
