NAGTINGUHA karon ang labing-unang babaye nga Kongresista sa segundo distrito sa Bohol Vanessa C. Aumentado sa pagduso og mga balaudnon nga makatabang sa pag-ugmad sa natad sa agrikultura sa nasud nga Pilipinhon.
Kini ang iyang gibutyag atol sa kalihukan nga iyang gitambungan sa kalungsuran nga sakop sa iyang distrito karong bag-o.
Si Aumentado nagtinguhang moduso sa ‘Proposed Livestock, Poultry and Dairy Bill’ tungod sa iyang kabalaka nga uno porsiyento ra ang produksiyon sa ‘dairy industry’ sa nasud samtang 99 porsiyento ang gikan sa laing nasud nga dili makaya pagpalit sa kadaghanan.
Suportado usab ni Kongresista Aumentado ang tinguha nga himoong ‘dairy capital’ ang lungsod sa Ubay sa tibook Pilipinas.
Gihisgutan usab ni Aumentado ang pagpasar sa balaud mahitungod sa ‘coconut industry development’ diin ang salapi nga anaa sa gobiyerno gikan sa ‘coconut levy’ ang mukantidad sa P75-bilyones diin P30-bilyones niini ang ‘assets’.
Gipasabot niini nga ubos sa maong balaudnon, ang interes ihatag sa mga mag-uuma sa lubi nga gimando sa balaud ug lakip niini ang mga ‘processing equipment’, ‘scholarship programs’, tabang sa paghatag og gahum sa organisasyon ug uban pa.
Kinahanglang mohatag usab ang gobiyerno og P10-bilyones matag tuig sa Philippine Coconut Authority aron matubag ang responsibilidad niini sa ‘coconut industry’, dugang ni Kongresista Van-van Aumentado. (RTB)
