TALIWA sa iyang kabag-o sa katungdanan isip pinakataas nga opisyal sa lalawigang Bol-anon, way pagduha-duha nga mihatag og pagsalig ang mga kaubang opisyal sa gobyerno ug pribadong sektor nga mangulo sa kinatas-an nga planning and policy making body sa rehiyon, ang Regional Development Council( RDC).
Si Gobernador Aris Aumentado ang usa sa gituboy nga mamahimong chairman sa RDC-7 (Central Visayas) diin nominado usab sa pagka-chairman si Negros Oriental Gov. Fray Teves.
Nominado si Aumentado sa maong posisyon atol sa tigom sa konseho kaniadtong Lunes, Agosto 22, 2022 didto sa Bai Hotel sa dakbayan sa Sugbo.
Hinuon, si Presidente Ferdinand Marcos Jr. ang mopili ug motudlo kung kinsa ang RDC Chairperson ug Co-Chairperson subay sa Executive Order No. 325, s. 1996 nga naghatag alang sa pag-organisar pag-usab sa mga RDC.
Kung ang Presidente magtudlo sa Chairperson gikan sa sektor sa gobyerno, ang Co-Chairperson pilion gikan sa pribadong sektor, ug vice-versa.
Ang RDC nagsilbi nga kaabag sa National Economic and Development Authority (NEDA) Board sa sub-national level.
Kini ang nag-unang institusyon nga nag-coordinate ug nagtakda sa direksyon sa tanan nga mga paningkamot sa pagpauswag sa ekonomiya sa rehiyon.
Nagsilbi usab kini nga forum diin ang lokal nga mga paningkamot mahimong may kalabutan ug mahiusa sa mga kalihokan sa pagpauswag sa mga rehiyon ug nasud. (RTB)
