KABAHIN sa adbokasiya sa Rotary Club of Pasay Cyber City ug Ph CARES(RCPCC-PhC) alang sa mga kabatan-onan mao ang sports-based development program.
Nahitukma kini sa pagbisita sa presidente sa RCPCC ug Ph Cares Chairman Elmer Francis Pasion sa lungsod sa Valencia tungod kay magsugod ang Sports League sa lungsod sa Septyembre 4, 2022.
Kauban ni Mr. Pasion si Capitol Senior Adviser for Strategic Investments ug kanhi CDA Administrator Benjie Oliva nga midonar sa 15 ka bola alang sa basketball ug 15 ka bola alang sa volleyball ngadto kang Valencia Mayor Engr. Dionisio Neil Balite, Ph.D sinaksihan sa kanhi bise-gobernador sa Bohol nga iya amahan, Atty. Dioning Balite, PhD.
Gipasabot ni Oliva nga ang sports mao ang labing epektibo nga rehabilitasyon ug porma sa sosyalisasyon alang sa mga kabatan-onan karon busa mahinungdanon kaayo nga maghimo og mga programa aron sila maapil niini.
Samtang si Mayor Neil Balite nagpasalamat sa grupo ni Oliva ug Pasion sa pagpili sa iyang lungsod nga usa sa mga nakabenipisyo sa ilang programa.
Sa susamang kalambuan, laing lungsod nga nakabenepisyo sa programa sa RCPCC-PH CARES mao ang Dauis.
Sila si Oliva ug Pasion ang mitugyan usab sa 20 ka bola sa Basketball ug 20 ka bola sa Volleyball ngadto na sa kanhi mayor sa lunsgod Marietta Merriam Sumaylo nga karon mao na ang bise-mayor.
Ug katapusang lungsod nga ilang nahatagan sa mga bola mao ang Buenavista diin personal usab nga midawat sa ilang donasyon ug miabi-abi si Mayor Dave Duallo.
Sigon ni Oliva nga tag 35-ka bola alang sa duwa nga basketball ug volleyball ang ilang nahatag sa lungsod nga nakakuhag pagdayeg ug pasalamat gikan sa mayor.
Sila usab si Oliva ug Pasion ang nahimong pinasidunggang-bisita sa ika-112 ka tuig nga Foundation day celebration sa Barangay Baang, Catigbian, ang lugar nga natawhan sa nahauna. (RTB)
