MAKADAWAT sa tabang pinansyal sa gobyerno sa Septyembre niining tuiga ang mga pamilya nga wala pa makadawat sa P5,000 nga cash assistance alang sa mga biktima sa Bagyong “Odette”, sigon sa unang babaye nga magbabalaod sa Segundo distrito sa Bohol.
Si Kongresista Vanessa Cadorna Aumentado ug ubang opisyal sa House of Representatives nakigtagbo karong bag-o kang Department of Social Welfare and Development Undersecretary Marco Bautista diin ang ulahi nagkanayon nga P1.5-bilyones ang gipagawas sa Department of Budget and Management (DBM) aron pondohan ang cash assistance program.
“Ato na karon sa proseso sa pag-andam sa mga detalye sa distribution para sa mga apektadong pamilya,” matod ni Bautista.
Nasayran ni Aumentado nga mokabat sa 149,896 ka pamilya sa Bohol ang wala pa makadawat sa hinabang pinansyal, kapin sa walo ka buwan human ang bagyong Odette mihapak sa Bohol niadtong Disyembre.
Una niini sa miaging semana, si Charo Poligrates sa Social Welfare and Development office sa Bohol niingon nga 17 ka local government units ang wala pa makadawat sa cash aid.
Siya nitaho nga sa pagkakaron nahatag na nila ang cash aid ngadto sa 125,946 ka benepisyaryo sa 31 ka lungsod, nga nagpagawas sa kinatibuk-ang P628,825,000. (RTB)
