DAKO ang kalipay sa taga Poblacion Weste, Catigbian human nga sa katapusan maatupan na gyud ang ilang gitukod nga bag-ong kapilya.
Sumala pa sa pangulo sa Parish Pastoral Council (PPC) kinsa kasamtangan nga konsehal sa lungsod ug molopyo sa lugar Hon. Mariano Maglahus Jr, nga nalipay silang tanan nga mahuman na gyud ang ilang gitukod nga kapilya.
Human kini nga si kanhi National Youth Commission (NYC) commissioner ug kanhi Cooperative Development Authority (CDA) Administrator Benjie ‘Bobong’ Oliva midonar sa cash 50K pesos aron mapalit na ang atop (color-roofed) nga gikinahanglan.
Nasayran nga giturn-over ni Oliva ang kantidad duyog sa ilang pamilya atol sa gihimong kasaulugan sa Barangay Foundation Day kaniadtong Agosto 16, 2022 sulod sa municipal gymnasium.
Samtang si Oliva sa iyang pakigpulong miingon nga sa kanunay andam siya nga mutabang sa iyang kaigsonan tungod kay dinhi siya nagdako ug iyang nakita nga kinahanglan sa mga tawo ang mao usab nga balay-alampuan.
Gihagit usab ni Oliva ang tanan nga magtinabangay aron mas mulambo pa ang ilang barangay ug dugang pang kalambuan ang muabot sunod tuig atol unya sa birthday sa barangay.
Nihatag usab si Oliva sa ‘cash prices’ alang sa mga banay nga nakadaug sa indigay sa pinakadaghan og tanom-utanon pinaagi sa backyard-gardening gikan sa purok-1 hangtud sa purok-8. (RTB)
