GIAWHAG sa Bol-anong asst. secretary sa DA-Visayas Atty. Salvador Diputado, Ph.D ang mga biyahedor gikan sa Mindanao ug ubang bahin sa Luzon nga dili na magdala og karne sa baboy ingon man lechon nga baboy inig-anhi nila sa bisan asang lalawigan o lugar sa kabisay-an.
Nasayran ning pamantalaan nga ang Departamento sa Agrikultura (DA) nagpatuman sa hugot nga border control pinaagi sa pagdestino og meat inspectors sa mga pantalan aron masiguro nga dili makasulod sa Visayas Island ang African Swine Fever (ASF).
Sumala ni ASec. Diputado nga lami nang daan ang mga lechon sa bisan asang bahin sa Visayas hinungdan nga dili na kinahanglang magdala sa maong matang sa sud-an nga gikan sa laing lugar isip paniguro nga dili makasulod ang ASF dinhi.
Nagkanayon ang opisyal nga ASF free gihapon ang Visayas ug aron mapadayon kin gidili gihapon ang pag-import ug buhi nga baboy ug mga produkto sa baboy gikan sa mga lugar nga adunay kompirmadong kaso sa ASF, lokal ug international.
Ug kon makasulod ang ASF sa kabisay-an maapektohan ang lokal nga ekonomiya diin ang Central Visayas gikonsiderar nga usa sa labing dako nga tigsuplay og buhi nga baboy ug produkto sa baboy sa nasud.
Sigon ni Diputado nga laing lakang nga gipatuman sa DA alang sa pagpugong sa pagsulod sa ASF mao ang hugot nga pag-monitor sa mga ihawan palibot kabisay-an. (RTB)
