PAHINUMDOM: Kining maong artikulo-opinyon para sa katawhan ug sa gustong mahimong lider sa katawhan.
KON AKO MAHIMONG LIDER SA KATAWHAN, modawat ako og kritisismo o tambag.
Kon ako mahimong lider sa katawhan, dili ko mangawat sa ilang kuwarta.
Kon ako mahimong lider sa katawhan, maminaw ko sa ilang mga yangungo, suliran o problema. Pangitaan og tubag ug solusyon ang ilang mga reklamo, kutob sa akong mahimo.
Kon ako mahimong lider sa katawhan, molihok ko base sa akong ‘duties and responsibilities and functions’.
Kon ako mahimong lider sa katawhan (ilabina ang pagpanday og Ordinansa o Balaudnon), maningkamot ko nga makahimo niini ug mapasar aron magamit ug mapahimuslan.
Kon ako mahimong lider sa katawhan, moalagad ako kanila kutob sa akong makaya; dili magtinapulan o magpasinaw sa lingkuranan o magpabugnaw ra sa opisina.
Kon ako mahimong lider sa katawhan, ihatag nako ang de kalidad nga serbisyo-publiko.
Kon ako mahimong lider sa katawhan, walay pihig-pihig ang akong pagserbisyo kanila.
Kon ako mahimong lider sa katawhan, dili ko magkinipi o mahimong panit-sibuyas sa mga pagsaway gikan man kanila o sa mga kaatbang sa politika.
Kon ako mahimong lider sa katawhan, dili ako mag-inabusar sa akong gahum; dili magwaldas sa ilang salapi.
Kon ako mahimong lider sa katawhan, magpaubos ako isip ilang sinugo, kay sila ang tinuod nga agalon o gobyerno.
Kon ako mahimong lider sa katawhan, maningkamot ako nga panalipdan ang ilang mga tawhanong katungod ilabina kadtong walay hamong sa balaod ug huyang sa hustisya.
Kon ako mahimong lider sa katawhan, magpakalider ako subay sa mandato sa Batakang Balaod sa nasud Pilipinhon ug sa akong lungsod o probinsya.
Kon ako mahimong lider sa katawhan, ang ilang interes ang akong pakadak-an, alang sa ilang kaayuhan.
Kon ako mahimong lider sa katawhan, magmatinud-anon ako sa akong pag-alagad.
Kon ako mahimong lider sa katawhan, magpakalider ako nga may gugma ug respeto.
Kon ako mahimong lider sa katawhan, maningkamot ako nga mahimong lider subay sa Sugo sa Kahitas-an.
Busa, tabangi ako o Ginoo kon moabot ako sa maong takna.
Daghang salamat.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
