BASIG ag imong gikaon nga pagkaon maoy nakaingon. O di ba kaha ang imong mga tambal nga gitumar. Basin pu’g ang tono lang sa imong sinultian. Ato kunong subayon.
Definition of Quarrel: “Ten percent difference in opinion, and ninety percent wrong tone of voice”. Pagkadawat nahu ini sa text message, ang akong reaksyon, “Tumpak! Mao jud!”. Kasagaran bitaw makakita ta’g away, sa atong pamilya, sa opisina, mga higala, silingan ug uban pa, gamay ra’ng bikil, pero inig-singka nato o sa pikas ba kaha, tapos! Mosilaub ang away. Paita. Hahay, daghan pa ta’g “tungasonon” aron mouswag ang pagkatawo. Hinay-hinay lang tag tungas. Mag-inampoay ta.
Depression linked to processed food. Matud sa mga eksperto ang pagkaon kuno og mga processed food sama sa mga de lata, chorizo, ug susamang mga pagkaon adunay kalambigitan sa kanunay’ng pagkamagul-anon. Sa laing bahin, kadtong mga tawong kanunay mokaon og utan, prutas ug isda dyutay ra ang risgo sa depression kon kaguol ug kaluya.
May usa ka pagtuon diin 3,500 ka mga middle-aged nga empleyado sa gobyerno didto sa Great Britain ang gi-obserbahan sa ilang kaon sud sa lima ka tuig, matud sa British Journal of Psychiatry. Gitunga ang mga partisipante sa duha, ang kusog mokaog processed food lakip ang sweetened desserts, fried food, processed meat, refined grains, ug high-fat dairy products; ug ang kusog mokaog utan, prutas ug isda.
Human sa makuting pakisusi ug pagtan-aw usab sa gender, edad, edukasyon, pisikal nga kalihukan, panigarilyo ug mga sakit-sakit, nadiskubrehan nga daku gayud ang epekto sa managlahing kaon o diet. Ang hingaonon og utan, prutas ug isda adunay 26% nga risgo sa depression, samtang ang hingaonon og processed foods adunay 58% nga risgo sa depression. Kwedaw.
Palamuot pero tinuod bisag unsang tuiga. Pangutana: Unsay kalainan sa lalaking motaya og lotto sa lalaking makig-away sa iyang misis? Tubag: Mas dakug chance modaug ang lalaking motaya sa lotto. Huhuhuhuhu, tiaw-tiaw lang.
