RADICAL, Revolutionary. Kini mga pulong nga kasagaran gi-associate sa pagkabayolente. Apan dili kini mao ang tinuod nga kahulogan niining mga pulonga. Ang tinuod nga kahulogan sa pagka-radikal mao ang pagpunting sa kinauyukan sa problema. Ang pagka-rebolusyonaryo nagpasabut nga adunay gipaningkamotan nga pangkinatibuk-an o kumpletong kausaban o radical change.
Dili kinahanglang bayolente ka aron imong mapunting ang kinauyukan o ugat sa problema. Dili ka kinahanglang mogamit sa violence aron ipatuman ang kumpleto o radical change. Ang nakalibog lang sa kadaghanan mao kini: kasagaran kanato nagtuo nga ang kinabuhi materyal lamang; tungod niana gipamatay ang mga drug suspects, kay nagtuo kita nga pinaagi sa pagpatay masulbad ang drug problem. Nagtuo ang kadaghanan nga ang tawo sama lamang sa usa ka butang o hayop ug mahimong patyon diha-diha.
Apan sayup ang maong pagtuo tungod kay kon kumbinsido ka nga ang Dios gugma ug ispiritu; ug nga ang tawo gimugna segun sa larawan ug dagway sa Dios, nan, makaamgo ka nga ang paghigugma ug pag-amomang ispirituhanon maoy tiunay nga radical ug revolutionary. Sa ato pa, tungod kay ang tawo gilalang man sumala sa larawan ug panagway sa Dios, dili butang o hayup ang tawo nga mahimo lang pasipad-an. Ang tawo, sama sa Dios, sa iyang esenya ispiritu nga motunhay diha sa gugma.
Maoy hinungdan nga sa dihang ang usa ka taga-Palestine gi-torture sa mga sundalo ug hapit na mamatay, iya silang giampo sa pag-ingon, “Amahan, pasayloa sila kay wala sila masayud sa ilang gibuhat”, kana mao ang labing radikal ug rebolusyonaryong aksyon o buhat sukad-masukad sa usa ka tawo. Rebolusyonaryo ug radikal kini tungod kay mipunting kini sa kinauyukan sa ugat sa problema sa tawo: ang pagka-ignorante sa tawo sa iyang pagka-ispirituhanon, ug sa iyang pagka-ignorante sa iyang pagkamahigugmaon.
Ako kining gipasabut kaninyo pinaagi sa alimpatakan. Pero moangkon gyud ko nga layo pa kos tinuod pag-abut sa binuhatan. Nakigbisug pa ta anang dapita; masuso pa ta sa natad sa kahimatngon ug pag-practice sa Kristohanong gugma. Sa edad hapit na ko ma-senior citizen, pero kindergarten pa pag-abut sa mga Kristohanong buhat, pagpasaylo ug pagpasensya.
Lisud kanako ang paghigugma sa usa ka politico ug iyang luyo-luyo nga naghari nga morag ilang kwarta ang gisweldo kanato. Lisud kanako ang paghigugma kanimo kon ang imong suportaan nga mga politico mao kadtong tigpanamastamas sa human rights, tigpamatay og mga inosenteng tawo, o ba kaha politico kansang pamilya mikurakot sa Ten Billion US Dollars nga kwarta gikan sa panudlanan sa gobyerno ug sige pa gyug pamakak bahin niini.
Angay unta ka nakung higugmaon tungod kay wa ka masayud sa imong gibuhat, ug wa kay saktong pagsabut sa kamatuoran nga gitagoan sa mga binayrang trolls sa Facebook ug dili nimo madiskubrehan. Pero huyang pud ko.
Huyang tungod kay wala pa koy igung kaisug o moral courage pagbarug alang sa kamatoran sama kang Leni Robredo. Siya nga mibuhat gayud sa iyang gipanulti, “Mas radikal ang magmahal”. Siya ang atong Vice President karon. Usa ka abogada ug ekonomista nga nagtrabaho ug naningkamot sa pagsilbi sa katawhang Pilipinhon bisan pa man kon gilaslasan ang pondo sa iyang opisina sa iyang mga kaatbang nga gustong magkalisud-lisud siya. Si Leni Robredo padayong nagsilbi sa kagamhanan, ilabi na ang mga kabus, bisan pag giinsulto ug giatake siya sa nagkalain-laing mga bakak ug pasangil nga dili tinuod.
Wala pa ko makaangkon sa iyang kaisug ug kaaghop paghigugma bisan sa iyang mga kaatbang. Talagsaon kaayo si Leni Robredo, ilabi na sa natad sa pulitika. Kita gyuy alkanse kon masayup ta pagpili sa umaabot nga eleksyon og dili na nato matagamtam ang iyang sebisyo ug liderato tungod kay atong gipili ug gibotohan kadtong mga kawatan ug bakakon. Dios ko, tabangi ug lamdagi kaming mga Pilipinhon ug ang among nasud!
