KAPIN sa 3,000 ka mga pamilya sa Bohol ang gitangtang sa listahan sa mga nakadawat sa conditional cash grants sa gobyerno nga gitunol isip kabahin sa poverty reduction program.
Si Jiah Sayson, ang Department of Social Welfare and Development (DSWD) regional focal person sa Central Visayas, niingon nga 3,538 ka mga tawo ang na-delist sa ilang Pantawid Pamilyang Pilipino Program (4Ps) tungod sa lain-laing rason sugod niadtong Agosto 1, 2022.
Matod ni Sayson, pipila sa mga na-delist ang namalhin nga walay pahibawo sa DSWD. Ang uban usab wala nay mga anak ubos sa 18 anyos samtang ang uban wala makatuman sa mga rekisitos nga gitakda sa DSWD.
Namatikdan ni Sayson nga ang uban gitangtang usab sa listahan tungod sa “validated” misbehavior sama sa pagprenda sa ilang pantawid ATM, drug addiction, alcoholism ug involvement sa ubang illegal activities.
Samtang, 5,742 ka mga indibidwal ang “naka-graduate” sa programa ug gikonsiderar nga self-sufficient.
Matod ni Sayson, aduna nay 60,065 ka aktibong 4Ps nga benepisyaryo sa Bohol. Bisan pa, mga 19,143 kanila ang gipailawom sa validation tungod kay sila sa sinugdan giila nga “dili kabus.”
Uban sa delisting ug graduation sa pipila ka mga recipients, ang DSWD gikatakdang mopailawom sa “massive replacement” initiative diin ilang gitarget nga ma-enrol ang 154,000 ka mga panimalay sa Central Visayas ngadto sa 4Ps program.
Wala pa hinuon matino sa DSWD kung pila ka mga panimalay gikan sa Bohol ang ma-enrol niini. (RTB)
