GUSTO sa labing una nga babayeng magbabalaod sa Segundo distrito sa Bohol nga e-review sa 19th Congress ang pipila ka probisyon sa Expanded Senior Citizen Act of 2010 gumikan kay adunay ubang mga senior citizen ang nakasinati og dili makiangayon nga sitwasyon.
Matud pa ni CongW. Vanessa C. Aumetado nga kinahanglan nga mahimoan og paagi ang emergency nga sitwasyon sa mga senior citizen ilabi na sa panahon nga aduna kini representante sa pagpalit og tambal diha sa mga botika.
Giingon sa kongresista nga adunay sitwasyon nga wala nakadala og “authorization letter” ang representante ug ID ra sa senior citizen ang nadala niini diin ang establisamento wala mo-entertain sa ID ug nangita gyud kini og authorization letter.
Gilakbit sa kongresista ang probisyon sa Section 4 (k) sa Akta Republika Numero 9994 kun “Express ” or “Priority” lane sa commercial ug government establishments nga ang representante sa senior citizen kinahanglan lang og dokumento nga magsilbing pruweba.
Tumong niya nga panahon sa emerhensiya makalinya lang unta sa priority lane ang mga representante sa senior citizen.
Nagkanayon si CongW. Aumentado nga angayan lang unta nga ikonsiderar ang OSCA ID ug iyang gidayeg ang mga establisamento nga modawat ra niini.
DUGANG KOMITIBA
Mapasalamaton na usab si Kongresista Vanvan Aumentado human kini matudlo nga sakop sa laing tulo ka mga komitiba sa kamara-baha kaniadtong Miyerkulis, Agosto 10.
Sigon ni CongW. Aumentado nga dako kining garbo alang sa mga Bol-anon nga iyang gipresentahan nga naapil siya sa mga nag-unang momitiba sa ubos balay-balauranan karon.
Kini naglakip na sa Committees on Appropriations, Ecology, ug Disaster Resilience nga nahuptan niini karong bag-o.
Kahinumduman nga sa pagbukas sa sesyon sa Kongreso, gitudlo kini nga Vice-Chairperson sa Committee on Tourism ug Special Committee on Creative Industry & Performing Arts.
Samtang siya usab sakop kon miyembro sa Committee on Accounts; Committee on Health; Committee on Science & Technology; Committee on Visayas Development; ug Committee on Trade & Industry.
Sigon ni Aumentado nga bisan sa iyang ka bag-o pa isip magbabalaod (neopyhte), ang liderato sa Kamara-Baha wala magmakuli sa pagsangon sa maong mga komitiba. (RTB)
