ANG mga quarry operators sa Bohol mikompirmar ngadto kang Gob. Aris Aumentado nga si “Ivan” nangilkil sa kwarta gikan nila (operators).
Usa sa mga quarry operators, nga wa hinganli, nagtug-an nga siya gipangayo-an ni “Ivan” sa P300,000.00. Apan, wala gi-explain kon para asa o para unsa ang maong kantidad.
Kini mitumaw atoll sa tigum sa mga quarry operators sa Bohol gahapon nga gipatawag sa gobernadora sa Kapitolyo, Tagbilaran City.
Si “Ivan” usa ka personahe nga wa-hiilhi, apan, gibaniog nga nangolekta sa kwarta gikan sa mga quarry operators sa kanhi administrasyon nga gisundan ni Aumentado.
Apan, kini gipanghimakak ni kanhi Gob. Arthur Yap nga walay “Ivan” nga kawani sa Kapitol nga nalambigit sa pagdumala sa quary operation sa Bohol.
Si kanhi Bokal ug karon Bise-Gob. Victor Balite miisa niini sa Sangguniang Panlalawigan diha sa iyang privilege speech aron susihon. Apan, ang kampo ni kanhi Bice-Gob. Rene Relampagos nagpakita nga wala magtagad niini nga isyu.
Sa maong tigum, gihangyo ni Aumentado ang mga operators nga ubsan ang ilang presyo sa baligya nilang anapog kay wala na man si “Ivan” sa iyang pamunoan.
Nihangyo usab si gobernadora nga ipa-ihag ang ilang mga transaction sa quarry kay wa’y mangayo kanila gikan sa iyang administration.
Matud ni Aumentado nga dili manuko og tabang ang iyang pamunoan, basta mo-cooperate usab ang mga quarry operators.
Ang tigum gitambongan sa Bohol Mineral Resources Regulatory Office (BMiRRO) nga gipangulohan ni Ana Luisa E. Galicinao.
