GIHINGUSGAN sa Department of Education Region 7 ang adbokasiya batok sa dengue ug hugot sila nga nakig-alayon sa pipila ka mga Non-Government Organizations (NGOs).
Suma pa ni Dr. Salustiano Jimenez, Regional Director sa DepEd Central Visayas nga kabahin sa ilang Brigada Eskwela ang kalihukan pagpakigbatok sa dengue sama sa paglimpyo sa palibot sa mga tunghaan ilabi na kadtong dunay nagpundo nga tubig.
Lakip sa miabag kanila mao ang Rotary Club nga mihatag og kagamitan pagsumpo sa pagkatap sa lamok nga magdala og dengue.
“Para sugod sa klase wala’y mahitabong dengue moingon nga gikan sa eskwelahan”, suma pa ni Dr. Jimenez.
Samtang ang kagamhanan sa dakbayan sa Tagbilaran sa ilang bahin nakig-alayon sab sa Department of Education Tagbilaran City division alang sa kampanya batok dengue.
Si Dr. Joseph Irwin Lagura, Officer-in-Charge miingon nga ang DepEd-City Div. dunay task force nga mo-edukar sa mga tinun-an sa pagpanglimpyo.
Gihulagway ni Lagura nga importante gyud nga ang mga eskwelahan nagpabakana sa pakigbatok sa dengue. (RTB)
