NAKADAYEG ang bag-ong amahan sa lungsod sa Valencia sa ‘Love ko To Project’ sa kapolisan alang sa kabataan sa duha ka mga barangay.
Sumala ni Engr. Dionisio ‘Niel’ A. Balite, Ph.D nga siya nagpasalamat sa kapolisan sa lungsod tungod kay sa ingon niini nga paagi mas mulambo pa ang relasyon sa katawhan ug kapolisan.
Gipasabot ni Mayor Balite nga importanti usab ang partisipasyon sa katawhan o kumunidad diha sa pag-imposar sa balaod kon law enforcement.
Nasayran sa amahan sa Valencia nga gitumong sa kapolisan karon ang pagpalig-on sa ilang relasyon tali sa kabataan o katawhan.
Nanawagan usab ang mayor sa mga Valencianhon nga dili magmakuli pagtaho sa kapolisan sa bisan unsa nga katingad-an sa ilang mga lugar.
Una niini, dili muminus sa 21 ka mga bata gikan sa Barangay Adlawan ug Canduao Occidental sa lungsod sa Valencia ang gidala sa Tagbilaran City kaniadtong Biyernes, Agosto 5.
Ang mga bata naniudto sa Mcdonald’s sa BQ-Mall ug miadto usab sila sa World of Fun- ICM aron magduwa.
Kini nga aktibidad katambayayong ang Sangguniang Kabataan sa Adlawan ug Canduao Occidental.
Tumong sa maong kalihukan nga mahatagan ug kahigayonan ang mga bata nga walay pribilihiyo nga makabisita sa siyudad ug matukod ang pagsalig sa mga bata ngadto sa mga polis. (RTB)
