GIHUPTAN na karon sa usa ka Physical Therapist Registered in the Philippines (PTRP) nga si Congresswoman Alexie Tutor ang Committee on Civil Service and Professional Regulation sa House of Representatives.
Si Tutor, kanhi vice-chairperson sa House Committee on Health, napili ug maoy misunod ni Iligan City Representative Frederick Siao isip pangu sa maong komitiba atol sa sesyon sa kongreso niadtong Miyerkules, Agosto 3, 2022.
Subay niini, mapasalamaton si Tutor sa iyang mga kaubang kongresista sa pagsalig ngadto kaniya.
Karon nga siya na ang nangulo sa maong komitiba, miingon si Tutor nga ang iyang unang lihukon ug pangusgan nga mapasar mao ang iyang House Bill 2045 o mas nailhan nga “ The Philippine Physical Therapy Law of 2022” nga iyang giduso sa nakalabay’ng 18th Congress.
Naglakip sa hurisdiksiyon sa Committee on Civil Service and Professional Regulation mao ang mga butang nga may kalabutan sa organisasyon, operasyon, pagdumala, mga lagda ug regulasyon sa serbisyo sibil; ang kahimtang, kaayohan ug benepisyo sa mga opisyal ug empleyado sa gobyerno; ug ang regulasyon sa mga propesyon.
Kahinumduman nga lakip usab sa mga giladlad nga priority bills ni Tutor mao ang House Bill 2046 o ang Public Dentist Salary Standardization Act of 2022.
Gitambongan pa gani ni Congw. Tutor ang ika-48 nga Induction Ceremonies and Scientific Lectures kon diin iyang nakahimamat si PDA Pres. Dr. Cheryl Del Rosario ug uban pang mga dignitaries sa PDA.
Mapasalamaton usab siya sa Bohol Dental Chapter nga gipangulohan ni Dr. Shiela Mantilla.
Ang maong Sugyot Balaudnon dunay suporta sa 100 ka Dental Chapter sa tibuok nasud lakip na ang mga magbabalaud nga mopaluyo niini.
Si Tutor myembro sa Nacionalista Party ug nisuporta ni Cong. Ferdinand Martin Romualdez pagka speaker. (Kahlil Lester O. Camba ug RTB)
