NAGPABILIN gihapong gipahamtang sa Bureau of Fisheries and Aquatic Resources (BFAR) ang shellfish ban sa kadagatan sa syudad sa Tagbilaran ug lungsod sa Dauis human nagpositibo gihapon sa paralytic shellfish poison o red tide toxin ang mga samples nga nakuha sa kabaybayonan niini.
Sigun sa BFAR Bulletin No. 14 nga gipagawas niadtong Biyernes, Agosto 5, 2022 ang kadagatan lamang sa Dauis ug Tagbilaran ang nagpabiling nagpositibo sa ‘aquatic microorganisms’ nga maoy makaingon sa ‘paralytic shellfish poison’ sa tibuok Isla sa Visayas kauban ang laing duha ka mga lugar sa Mindanao.
Base sa Shellfish Bulletin sa BFAR, ang mga mosunod nga lugar nagpositibo usab sa paralytic shellfish poison: Dumanquillas Bay sa Zamboanga del Sur, ug Lianga Bay sa Surigao del Sur.
Subling gitumbok sa BFAR nga ang shellfish ug acetes sp. (alamang) nga makuha sa mga lugar nga may red tide, dili angay kuhaon, kaonon ug ibaligya.
Samtang ang mga isda, hipon ug lambay nga makuha sa mga apektadong lugar sa red tide luwas lamang kaonon kun lab-as kining nakuha ug hugasan og maayo sa dili pa lutuon.
Kahinumdoman nga ang BFAR-Bohol nipahigayon og “experimental” nga pagpananom og seaweeds sa kadagatan sa Barangay Bool ning syudad sa Tagbilaran nga gilaumang makatabang sa pagpakunhod sa red tide toxins sa maong mga lugar pinaagi sa pagsuyop sa sustansya nga maoy makaingon sa pipila ka phytoplankton, o microalgae, sa pagdaghan.
Ang pagdaghan sa densidad sa phytoplankton o microalgae makaingon sa taas nga konsentrasyon sa algal bloom, nga mas giila nga red tide.
Apan ang maong lakang nahunong human nabanlas sa kusog nga hangin ug ulan nga niigo sa syudad sa katapusang mga buwan sa tuig 2019.
Matud pa ni BFAR-Bohol Officer-in-Charge Candido Samijon, ang maong proyekto wala nilanat og dugay aron matino kun epektibo ba ang maong lakang sa pagpakunhod sa red tide toxins.
Ang red tide alert sa lungsod sa Dauis ug syudad sa Tagbilaran nagsugod sukad niadtong Marso 2018. (RTB)
