ANG pag-eskuwela maoy usa sa pinaka-importanteng aspeto sa kinabuhi sa tawo ilabina kon maghisgot og ekonomiya.
Dili ikalalis nga karong panahona kinahanglan nga anaay edukasyon aron makadungan sa kompetisyon sa kinabuhi — ang pagpangita og trabaho, panginabuhian ug pagpakabuhi.
Apan bisan sa pag-aghat sa gobyenro nga makabaton og edukasyon ang tanang Pilipino, dili gayud tanan makaangkon niini. Daghang hinungdan, ug usa na niini ang kapobrehon.
Hinuon, mas daghang edukado kaysa walay grado karong panahona ilabina ana-a ang programa sa gobyerno nga libreng tuition sa mga tulunghaan, pribado man o pampubliko.
Kon makahuman sa pagtuon, ang pagpangita dayon og trabaho maoy sunod nga buhaton sa mga bag-ong ni-gradwar.
Ana-a na sa hunahuna sa mga Pinoy nga importante ang edukasyon aron makabaton og tarong nga trabaho, aron mabuhi ang pamilya ug kaugalingon.
Lahi ang atong hunahuna sa mga Intsik kay ang mga Intsik inig human sa eskuwela, negosyo ang itukod dili ang pagpangita og trabaho — ang pagka-agalon dili pagka-sinugo maoy ilang gipakadak-an.
Apan mao na man siguro ni ang kinaiya sa Pinoy, ang pangutana: sayon ba ang pagpangita og trabaho karong panahona ilabina kon walay grado? Dili.
Kay bisan pa ana-a kay gigunitang degree o diploma, ana-a ang kompetisyon ilabina sa mga kompanya.
Sa kompetisyon sa pagpangita og trabaho, importante ang positibong panghunahuna ug kinahanglan puno kanunay sa kadasig, aron makasulod og trabaho. Siyempre, puhunan usab niana ang maayong batasan.
Sayod kita nga nagkamahal og ayo ang mga pamaliton karon ilabina gisungog kita sa pandemya sa COVID-19, sa Bagyong Odette kitang mga Bol-anon ug ang wala pa mahumang giyera sa Ukraine ug Russia nga maoy nagpadugang sa giantos nga kalisod sa mga Pinoy.
Karon, nabati gayud sa katawhan ang taas nga inflation rate nga ana-a sa 6.1 porsyento.
Sa niaging adlaw, ang akong ig-agaw mopalit unta og usa ka kilo nga karneng baboy apan sobra’s tunga ra sa kilo ang iyang napalit sa merkado kay niabot og P400 ang kilo sa maong karne.
Kana maoy usa sa nag-unang pananglitan kon unsa ka mahal ang mga nag-unang panginahanglan karon sa katawhan.
Karon, kon ikaw anaay income nga P300-P400 ang adlaw, kuwangon pa kini bisan imong kaugalingon ra ang buhi-on.
Kay kon mamasahe o manakayan ka, mahal ang plete. Kon anaay kaugalingong sakyanan, mahal ang gasolina o krudo.
Makaingon ta nga, lahi na gayud ang kalibutan karon. Dako na og kausaban, kausaban nga kasagaran negatibo.
Apan kay magpakabuhi man kita, kinahanglan anaay trabaho, bahala’g gamay ra ang suweldo basta kanunay.
Pero kon dili ka kontento sa gamay nga suweldo ilabina anaay ganahang gustong paliton o ganahan mosuroy, mas maayo mangita og trabaho nga makahatag og ginhawa sa kaugalingon.
Sa administrasyong Marcos Jr., usa sa gilauman sa katawhang Pilipinhon, nga mas makamugna og daghang opportunidad sa trabaho aron makabarog sa nagkataas og ayong mga pamaliton.
Basta ayaw kalimte nga maayong trabaho (legal) ang pangita-a ug trabaho-a.
Ug bisan dili ka dako og grado, importante nga kamao modiskarte sa maayong paagi. Magkugi aron mabuhi.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
