GIBUTYAG ni Duero Mayor Al Cadorniga Ladaran Taculad nga iyang ugmaron ang food tourism sa Duero. Kini human nisaysay siya atol sa pakighinabi sa mga sakop sa media nga mahimong barbecue section ang tapad sa Merkado Publiko. Dunay mga food stalls usab nga pagatukoron tapad sa Municipal gym alang sa mga turista nga mobisita sa Duero.
Wala pay labot niini ang pagpanindot sa Main Building sa Merkado Publiko nga gihulagway sa mayor nga “dilapidated” na. Dili man kini madali-dali suma pa sa mayor apan iya kining himoon “by phase”. Dunay 7 Milyon nga nabilin sa panudlanan sa lungsod nga gamiton sa pagpanindot sa Balay Lungsod matud pa sa mayor. Kini naglakip sa canopy ug uban pa alang sa mga constituents/bisita nga mobisita.
Dunay signage nga pagahimoon nga butangan og ” Municipality of Duero-Home of Fruits, Veggies and Spices” arun sa dugang pagpaila sa brand name sa maong lungsod.
Giawhag usab ni Mayor Taculad nga mahimong friendly ang mga LGU employees sanglit naa man sila arun sa pagpangalagad sa katawhan. Dugang pa niini, mapasalamaton siya nga mayorya sa Sangguniang Bayan pinangulohan ni Bise Mayor Hermes Bajao, Congw. Alexie Tutor, Gob. Erico Aristotle Aumentado, Bise Gob. Dionisio Victor Balite ug uban pa puros man pareha ang ilang panan-aw kon kalamboan na ang hesgutan. (Kahlil Lester Camba)
