GILUWATAN na ni Valencia Mayor Dionisio Neil A. Balite, Ph.D ang Executive Order No.1 – Establishing Transparency and Accountability Office (TAO). Si kanhi bise gobernador, Atty. Dionisio D. Balite, PhD ang tsirman sa maong departamento inubanan nila ni ret. Judge Helen P. Cabatos; kanhi auditor sa COA Region 7, Atty. Nilo Pala; kanhi auditor Rudy Palac; Albien Gamutan ug Urso Cajilog.
Matud pa sa mga tigpaniid sa pulitika nga susama kini sa Office of the Governance Accountability and Review sa Kagamhanang Probinsyal nga pangulohan ni kanhi CabSec Jun Evasco.
Atol courtesy call nga gipahigayon sa sakop sa media didto sa iyang buhatan, mas nadasig ang mga bisita sanglit mainiton man ang pagdawat sa mga nagkinahanglan o bisan kinsa nga mosampit.
Basehan sa maong Executive Order mao ang RA 3019 (Anti-Graft and Corrupt Practices Act) ug RA 6713 (Code of Conduct and Ethical Standards on Government Officials and Employees).
Lakip sa tahas sa maong buhatan mao ang pag imbestigar sa mga kalapasan sa duha ka mga Akta Republika nga gihinganlan ug pag sugyot sa mayor sa mamahimong legal nga lakang. (Kahlil Lester O. Camba)
