PABOR si Kongresista Vanessa Aumentado sa ikaduhang distrito sa Bohol sa pag-uktaba sa piniliay sa Sangguniang Kabataan (SK) ug barangay elections.
Gipasabot ni Aumentado nga dako og budget ang gamiton sa piniliay ug hinay-hinay pa nga nabalik ang ekonomiya ug daghang proyekto sa gobyerno nga nabiyaan gumikan sa pandemya.
Siya midugang nga mas maayo nga itagana una sa ubang galastuhan ang pundo nga gamiton sa eleksyon.
Sa nasayran pipila na ka mga kongresista ug senador ang mipabor sa pag-uswag sa SK ug brgy elections gumikan sa susama nga rason.
Adunay mga sugyot nga himuon kini sa 2023 aduna sab nagsugyot nga ari na sa tuig 2024. Hinuon si Aumentado sa iyang bahin niingon nga usa lang siya ka boto nga nipabor sa pagpostpone apan magdepende lang gyud kini sa mayoriya sa kongreso ug sa senado. (RTB)
COMELEC NANGANDAM
Padayon gihapon ang pagpangandam sa commission on elections sa barangay ug SK elections gumikan kay wa pay balaud nga nag-postpone sa eleksyon.
Kini ang gipadayag ni Atty. Ariel Selma, COMELEC Tagbilaran City Election Officer diin suma pa niini nga gamay pa ang nagpa rehistro nga mga tawo sa syudad.
Suma pa niini nga maihap lang ang mga tawo nga magparehistro matag adlaw sa ilang buhatan dapit sa karaang City Hall.
Sa nasayran gisugdan sa COMELEC ang voters registration kaniadtong Hulyo 4 ug molungtad kini sa petsa 23 ning buwana alang sa pagpangandam sa Barangay ug Sangguniang Kabataan (SK) elections nga mahitabo sa December 5, 2022.
Kahinumduman nga dunay lakang nga i-postpone una ang Barangay ug SK Elections sa sunod tuig o sa tuig 2024.
Subay niini, nanawagan si Atty. Selma sa katawhan nga dili huwaton ang deadline sa pagparehistro ug moadto na sa mga malls kun asa gipahigayon ang satellite registration. (RTB)
