KITANG TANAN sumala sa atong Batakang Balaod, anaay dakong responsibilidad sa komunidad ug katilingban nga atong gipuy-an.
Pasabot, ang matag usa kanato anaay bili sa atong nasud. Kay ang nasud dili molambo ug mo-uswag kon dili magtinabangay ang katawhan.
Ikaw, unsa may imong papel diha sa inyong komunidad ilabina sa inyong pamilya?
Sayod ko nga anaay nakasangon nga responsibilidad sa imong abagahan, gamay man o dako.
Hinumdomi nga bisan gani ang usa ka buang, anaay importansya sa atong komunidad kay apil sila sa kwentada isip tawo.
First time sa akong panumduman nga sa Kapitolyo sa Bohol anaay usa ka tawo nga nangayo og tabang sa mga trabahante aron mahibaw-an ang mga iregularidad.
Ang molingkuray na nga bag-ong gobernador, si outgoing Cong. Aris Aumentado sa Segundo Distrito, nanawagan sa mga empleyado sa Kapitolyo nga ibutyag ang ilang mga nahibaw-ang baho sa kasamtangang administrasyon.
Kini nahitabo tungod sa mga alegasyon nga dili mabang-bang ang korapsyon ilawom sa administrasyong Yap.
Ang mga Bol-anon ilabina ang mga ana-a nag-ampungad sa social media ilabina sa Facebook, nakasimhot og daghang dili maayong aktibidades kuno sa Kapitolyo.
Kita isip mga tinuod Bol-anon, angayang manginlabot kon unsay mga kahiwian sa atong gobyerno dinhi sa probinsya sa Bohol, kay kita ang gobyerno sa tanang gobyerno.
Dili magmalampuson ang atong gidamgong tarong ug patas nga pang-gobyerno hangtud anaay mga lider ug sinuwelduhan sa katawhan nga magbinuang sa ilang tagsa-tagsa ka trabaho.
Dili kita angay mahadlok sa pagsulti kon unsay tinuod nga nahitabo, kay kita kabahin kon unsay dangatan sa atong gobyerno.
Ako bitaw maong kasagaran pamolitika ug pang-gobyerno ang akong paboritong topic kay ana-a diha ang angay hatagan og igong pagtagad.
Daghan kanato nga hilom o dili mag-apil-apil sa mga isyu o kagubot nga nahitabo sa atong pang-gobyerno apan kusog moreklamo o magbagulbol kundili makatagamtam og maayo o sakto nga serbisyo gikan sa mga naglingkod sa mga opisina de gobyerno.
Hangtud dili kita magpakabana, padayong waldason sa mga abusado ug buaya nga lider sa katawhan ang atong salapi nga gipatuloan og singot.
Ang kalambuan ug kauswagan nga atong gipangandoy dili mareyalisar kon kutob ra kita sa istorya ug walay lihok.
Ako isip usa ka Bol-anon nga naghigugma sa atong katawhan ug probinsya, padayong mosuwat aron ipaambit ang akong mga hunahuna isip usa ka batan-on nga naggamit sa akong kagawasan ng musulti o magpadayag sa akong mga disappointments batok sa mga nagpabadlong nga lider sa atong barangay, lungsod, distrito, probinsya ug sa tibuok nasud Pilipinhon.
Sakit man tuod ang pagsulti sa kamatuoran kay anaay maligsan, kinahanglan isulti kay kana man ang sakto subay sa atong balaod ug sa mata sa Ginoo.
Do your part! Himo-a ang imong responsibilidad. Ayaw pagpakabuta-bungol sa mga panghitabo sa atong palibot.
Kaloy-i ang mga kabus. Tabangi ang mga dinaug-daug. Ug i-kondenar ang mga nagbuhat og salaod sa atong katilingban alang sa hustisya sa tanang gihikawan niini.
Atong suportahan ang mga nagtinarong nga lider de gobyerno.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
