SI Dave Grossman, usa ka military psychologist didto sa USA. Si Grossman gisugo sa US Army pagtuon sa mga pamaagi pagwagtang sa kahadlok sa tawo pagpatay sa iyang isig-ka-tawo. Matud ni Grossman iyang nadikusbrehan nga adunay tulo ka babag nga makapugong sa tawo pagpatay: lawasnong babag, kalagnong babag, ug espirituhanong babag. Ang US Army mimugna sa mga pamaagi aron pagwagtang niining maong mga babag.
Makalilisang hunahunaon nga mobuhat sa ingon ang mga ahensya sa kagamhanan aron lamang tudloan ang kasundalohan nga mamahimong hanas sa pagpatay. Apan ang labing makalilisang mao ang nadiskubrehan ni Grossman sa dihang gihangyo siya sa grupong Alliance for Childhood didto sa USA aron tun-an ang mga hitabo karong bag-o sa Littleton, Colorado, USA ug Erfurt, Germany diin adunay mga menor de edad nga nag-huramentado sa ilang eskwelahan ug gipamusil ang tanang mga inosenteng estudyante ug magtutudlo sa way kukahadlok.
Unsay hinungdan? Segun sa pakisusi ni Grossman kadtong mga batan-ong nag-huramentado pulos nahungog sa mga computer war games sama sa Counter-Strike, Mobile Legends ug uban pa. Si Grossman miingon nga ang mga bayolenteng computer games adunay susamang epekto sa mga pamaagi sa US Army pagwagtang sa lawasnon, kalagnon ug espirituhanong babag o kahadlok sa pagpatay. Usa kini ka mahinungdanong impormasyon alang sa tanang ginikanan ug kabatan-onan kay bisan dinhi sa ato, gikan sa Tagbilaran hangtud sa Ubay, daghan na kaayo ang mga computer games diin ang kabataan kanunayng nagyampungad.
Nakapahinumdum usab kini kanato niadtong 1988 diin kita, kauban sa pipila ka mga higala, milibot sa mga estasyonan sa radyo dinhi aron pagpangampanya alang sa Toys for Peace diin ang mga toys of war sama sa pusil-pusil kinahanglang ihiklin sa atong mga pamilya. Subo palandungon nga wala hatagig maayong pagtagad ang maong kampanya. Hinuon, dihay usa ka magsisibya sa radyo nga mibi-ay-bi-ay sa pag-ingon: “Unsa man diay paduwaan sa mga bata kon dili pusil-pusil, posporo?”. Kon dili bastos ang maong magsisibya, tingale ignorante lang.
Nan, karon ania nay mas ngilngig nga mga panghitabo. Paabuton pa ba nato nga adunay mga batan-on nga magdalag pusil sa eskwelahan ug maghuramentado nga magpatakag rakrak sa iyang palibut? Hagit kini, dili lamang sa kagamhanan nga molantaw aron adunay tataw nga regulasyon sa computer games alang sa kabataan; apan labaw sa tanan, hagit alang kanatong mga ginikanan.
Bantay kabataan! Likayi ang huramentado. Likayi ang bayolenteng computer games.
