GIBUTYAG ni Tagbilaran City Mayor Jane Cajes-Yap ang mga plano ug programa sa iyang administrasyon uban ni bise mayor Adam Jala sa mosunod nga tulo ka tuig.
Ang pinakabatan-on ug labing unang babayeng mayor sa Tagbilaran miladlad niini atol sa iyang inaugural speech dungan sa 56th Charter Day celebration sa dakbayan kaniadtong Hulyo 1, 2022.
Siya mihisgot sa impresibong buhat ug serbisyo sa iyang kapikas, kanhi mayor Baba Yap sulod sa siyam ka tuig nga pagserbisyo mao nga iyang giingong tukma nga ipadayon niya ang legasiya sa iyang bana.
Lakip niini ang pagpalapad sa existing health programs sa siyudad diin iyang ipatuman ang Balay to Balay Health check up sa katawhan.
Hatagan sab niya og dakong pagtagad ang edukasyon sama sa free quality education from pre-school to college ug tanang public elementary ug high school students makadawat sa school supplies gikan sa city government.
Si Mayor Jane molihok usab alang sa dugang kahigayonan sa panarbaho sa mga residente sa dakbayan.
Dugang niini, si Mayor Jane momugna sa post-pandemic recovery action plan alang sa pagpabangon sa ekonomiya.
Matod sa bag-ong mayor nga ang housing hatagan sab niyag prioridad ubos sa iyang administration.
Siya miingon nga dunay additional benefits sa mga senior citizens, persons with disability ug mga personnel sa city government. (RTB)
