NIHIMO sa ilang inaugural session kaniadtong martes, Hulyo 5, 2022 ang mga miembro sa 29th Sangguniang Panlalawigan sa Bohol pinangulohan ni Vice-Governor Dionisio Victor A. Balite didto sa New Capitol sa Tagbilaran.
Nasayran ning pamantalaan nga si Board Member Tita Baja sa 3rd District sa Bohol mao ang senior board member samtang napili nga floor leader mao si Board Member Benjie Arcamo sa 1st district, assistant floor leader mao si Board Member Jami Aumentado Villamor sa 2nd District ug si Board Member Nathan Binlod mao ang assistant floor leader sa 3rd district.
Ang SP inaugural session naghatag sa kahigayonan sa tagsa ka sakop niini sa pagpadayag sa ilang tagsa-tagsa ka “inaugural” speeches.
Apil nga nihatag sa ilang pakigpulong ang mga ex-officio members sa SP nga sila si SK Provincial Federated (SKPF) president Victor Bolos, Liga ng mga Barangay president Dr. Romulo Cepedoza ug PCL president Jescelo Adiong.
Ang mihatag sa ilang speeches mao sila si Board Member Benjie Arcamo, Lucille Lagunay ug Aldner Damalerio (first dist); BMs Atty. Tommy Abapo, Atty. Jamie Villamor ug Mimi Boniel (2nd dist); ug BMs Tita Baja, Greg Jala, Dr. Elpidio Bonita ug Nathaniel Binlod sa 3rd district sa Bohol.
Mihatag usab si Bise-Gob. Balite sa iyang ‘inaugural speech” isip presiding officer sa SP.
Sa maong session, gitambongan usab kini nila ni kanhi Bise-Gob. Dionisio Balite ug si Mrs. Greenie Aumentado, ang kapikas ni kanhi Guv. Erico Aumentado, amahan ni Gov. Aris Aumentado.
Lakip sa mitambong mao ang mga pamilya sa mga bag-ong SP members ug ang banay ni Vice-Governor Balite.
Gikonpirmar usab sa inaugural session ang appointments nila ni Provincial Administrator Asteria Caberte ug Provincial Legal Officer Atty. Handel Lagunay.
Gihatagan sab og katungod sa Sangguniang Panlalawigan sila si Provincial Administrator Asteria Caberte ug Atty. Antonio Amora Jr. chief of staff sa Office of the Governor nga makalagda og tseke ug transmittals sa kagamhanang probinsyal.
Gipasar pod sa Sangguniang Panlalawigan ang resolution nagbag-o sa signatories sa Landbank of the Philippines, Development Bank of the Philippines ug First Consolidated Bank accounts sa kagamhanang probinsyal nga ang mga signatories mao sila si Governor Aris Aumentado, Provincial Administrator Asteria Caberte, Atty. Antonio Amora Jr. Chief of Staff, Anne Mariquit Oppus, Deputy Chief of Staff.
Samtang sa Sangguniang Panlalawigan mao sila si Vice-Governor Dionisio Victor Balite ug Atty. Glenn Rey Anino ang iyang chief of staff ug Provincial Treasurer’s Office mao sila si Provincial Treasurer Eustaquio Socorin ug Danilo Arango, ang supervising administrative officer nga alternate signatory. (RTB)
