NAPAGAWAS na ang warrant of arrest batok kang Marnilou Ayuban, ang mayor sa Alicia, Bohol kinsa nakonbikto sa kasong graft.
Wala pa mopakita si Ayuban human giisyu ang warrant of arrest batok kaniya ug wala pa usab siya milingkod sa katungdanan.
Una siyang nanumpa sa katungdanan kaniadtong Hunyo 8, 2022 atubangan sa notaryo publiko nga si Atty. John Edward Trinidad.
Niadtong Hunyo 16, si Judge Jorge Espinal sa Regional Trial Court (RTC) Branch 51 sa Carmen, Bohol niluwat og warrant of arrest batok kang Ayuban ug kanhi konsehal Paul Villas, ang kasamtangang municipal budget officer, ug Eusebio Ayuban Jr.
Kini ang nakaaghat kang Ayuban nga itudlo si Municipal Administrator Junavie Piquero isip officer-in-charge sa Office of the Mayor gikan Hunyo 30, 2022 hangtod Hulyo 15, 2022 pinaagi sa Hunyo 30 nga memorandum order.
Si Ayuban adunay pending nga disqualification case ug petition for cancellation sa iyang Certificate of Candidacy (COC) atubangan sa Commission on Elections (Comelec) sa Manila nga gisang-at sa iyang kaatbang nga si kanhi Mayor Victoriano Torres III.
Human sa eleksyon, si Torres nisang-at og ‘quo waranto’ nga kaso sa RTC sa Carmen tungod sa material misrepresentation tungod sa kapakyas ni Ayuban pagdeklarar sa iyang kaso sa iyang COC.
Si Ayuban nakonbikto sa kasong graft sa dihang siya usa ka konsehal sa lungsod niadtong 2002 uban sa laing pito.
Ang kaso naggumikan sa reklamo nga gisang-at atubangan sa Office of the Ombudsman-Visayas ni Jonathan Puracan, kinsa gitudlo nga konsehal sa Alicia ni kanhi Bohol Gov. Rene Relampagos niadtong 2001.
Si Ayuban, uban sa laing pito ka sakop sa Sangguniang Bayan, giingong nagdumili sa pag-ila kang Puracan isip hulip ni Rogelio Balahay, kinsa ni-resign sa iyang katungdanan.
Niadtong Mayo 17, 2002, si Judge Patsita Sarmiento-Gamutan sa RTC Branch 51 niisyu sa warrant of arrest batok kang Ayuban ug pito ka uban pa human sa ilang pagkakombikto sa mga kaso sa paglapas sa Anti-Graft and Corrupt Practices Act.
Una niini, niadtong Hunyo 27, 2016, gihukman sa RTC ang walo ka akusado nga sad-an sa sala ug gisentensiyahan ang matag usa sa silot nga pagkabilanggo nga unom ka tuig nga adunay perpetual disqualification gikan sa katungdanan sa publiko.
Ug niadtong Marso 12, 2019, gipamatud-an sa Court of Appeals Special 20th Division sa Cebu City nga adunay kausaban nga naghimo sa silot nga pagkabilanggo hangtod sa 10 ka tuig ug unom ka bulan nga labing taas nga adunay perpetual disqualification gikan sa katungdanan sa publiko.
Samtang niadtong Marso 11, 2020, gibalibaran usab sa Supreme Court Second Division ang petition for review ug ang desisyon nahimong final ug executory niadtong Oktubre 14, 2020 nga natala sa Book of Entries of Judgments.
Niadtong Hunyo 7, 2022, gi-deny sa RTC ang manifestation with motion to hold in abeyance issuance of warrant to enforcement judgement.
Hinuon, gimando ni Espinal ang pagkanselar sa mga piyansa nila ni Ayuban, Villas, ug Ayuban Jr.
Unang migawas ang balita sa Manila Bulletin Online kaniadtong Hulyo 6, 2022 sa alas 4:04 sa kahaponon nga gisuwat ni Calvin Cordova. (RTB)
