NASIKOP sa kapolisan ang ika-4 nga most wanted sa Talibon karong bag-o. Gi-ila ang akusado nga si Raul Reguya, 47, ulitawo, mag-uuma ug taga Purok 1, Magsaysay, Talibon, Bohol.
Gidakop ang akusado kaniadtong Hulyo 4, 2022 didto sa Purok 2, barangay Balitawak, Talibon human gipatuman sa PNP AKG Visayas Field Unit, Talibon MPS ug RIU-Bohol ang warrant of arrest batok kaniya nga giluwatan ni Judge Azucena Macalolot Credo tungod sa krimen nga attempted murder.
Gibilanggo karon ang akusado sa PNP jail samtang P100,000 ang piyansa nga girecommendar sa korte para sa iyang temporaryong kagawasan.
Samtang sa pikas bahin, usa ka tawo nga anaa sa drug watchlist nadakpan didto sa Candijay. Gi-ila ang suspect nga si Christian Buscano, 26, ulitawo, ug taga barangay Panadtaran, Candijay, Bohol.
Gidakop kini sa Candijay Municipal Drug Enforcement Unit pinangulohan ni Police Major Gerald Luna, chief of police, kaniadtong Hulyo 5, 2022 pinaagi sa usa ka buy bust operation nga gihimo didto sa barangay Tugas, Candijay.
Nasakmit gikan sa suspect ang gibana-banang anaa sa 2.0 grams nga gituohang shabu ug dunay standard drug price nga P13, 600.00.
Gibilanggo karon ang suspect sa PNP jail samtang ang ebidensiya gisumiter ngadto sa Bohol PNP Crime Laboratory para sa examination ug gihikay na ang kasong ipasaka batoka kaniya nga kalapasan sa section 5 ug section 11, article 2 sa R.A. 9165 o Dangerous Drugs Act of 2002. (RTB)
