GIHAGIT ni kanhi Provincial Administrator Ae Damalerio og boksing si social media influencer ug supporter sa Abante Bohol Mr. Willy Ramasola.
Sa FB post ni Damalerio siya miingon nga “Mr. Willy Ramasola, sumbagay lang ta! or boxing,” ug iyang gisultihan si Ramasola nga magpili sa lugar ug oras asa sila mag boksing.
Dugang pa niya nga open ang lugar alang sa public viewing aron bibo naay referee or wala.
Dugang pamahayag ni Damalerio ngadto kang Ramasola nga “Kusog ug isog man ka mangdaut, mang bully, mang intimidate or mag intriga sa facebook”.
Matod ni Damalerio nga kini na ang iyang una ug kataposang tubag sa tanang Facebook posts ni Ramasola.
Nagkanayon pa si Damalerio nga kon ang intention ni Ramasola sa pagpangdaot og mga tawo pamolitika, nahuman na ang election kay kon dili kini personalan.
Si Ramasola ang nailang bug-at nga kritiko ni kanhi governor Art Yap ug sa iyang grupong Padayon Bol-anon kauban si kanhi vice governor Rene Relampagos ug Cong. Edgar Chatto.
Karong bag-o, si Ramasola mi-post sa mga hulagway ni Damalerio sa iyang farm samtang nag-harvest og mga utanon.
Dunay caption ang mga hulagway nga nag-ingon nga “Ang mga gipamalit nga mga binhi sa Capitol wala man manurok. Pero ang mga farms sa mga former officials sa Capitol nilambo man og maayo. Sana all”.
Sa tubag ni Ramasola sa hagit ni Damalerio, kini miingon nga “Bai, Talk to my manager. Bring it on. Sa usa ka radio interview, gihinganlan ni Ramasola si kanhi Tagbilaran city mayor Dan Neri Lim nga mibulontaryo nga maoy iyang manager.
Human migawas kining taho, ang hulagway ni Ramasola ug Damalerio kalabot sa maong fight ang nag-viral sa social media nga nag-ulohan og “Kumo sa Sandugo” nga giingong ang sangka ipahigayon sa old Tagbilaran airport ning buwan sa Hulyo. (RTB)
