NAAKSIDENTE ang laing unit sa Southern Star Bus Transit, Inc. (SBTI) sa usa ka national road sa lungsod sa Bilar sa man-made forest sayo niadtong Miyerkules.
Matod sa Bilar Police Station, ang bus nga paingon sa Tagbilaran City milapas sa karsada hinungdan nga nahulog kini sa kanal o gutter.
Ang drayber sa bus nga si Epifanio Padilla, ug 10 ka mga pasahero wala hinoon maunsa diin gihatud sila sa Tagbilaran City sakay sa laing unit sa SBTI.
Si Padilla nitug-an sa mga awtoridad nga nawad-an siya og kontrol sa sakyanan tungod sa danlog nga dalan.
Namatikdan sa mga otoridad nga nag-ulan mga oras sa wala pa ang insidente diin wala pay duha ka buwan, tulo na ka mga aksidente ang naglambigit sa SBTI.
Niadtong Mayo 26, labing menos usa ka dosena nga mga pasahero ang naospital human nabangga ang SBTI bus ug nabalitok pipila ka metros gikan sa bung-aw sa lungsod sa Loboc.
Laing bus sa SBTI ang nidasmag sa usa ka balay sa lungsod sa Loboc niadtong Mayo 29 nga miresulta sa pagkadaot sa mga kabtangan.
Apan, namatikdan sa mga awtoridad nga ang SBTI bus nahagsa tungod kay naglikay kini sa usa ka awto nga nibusikad ang usa sa mga ligid niini sa atubangan.
Niadtong Hunyo 16, nakuhaan og video ang bus sa SBTI nga daw wala na nisubay sa usa ka national highway sa lungsod sa Loboc.
Walay naangol atol sa insidente apan ang footage nga nag-viral sa Facebook nagpakita nga ang drayber sa bus nawad-an og kontrol sa sakyanan samtang niliko, nga nakamugna og siyagit sa mga pasahero. (RTB)
