GUSTO ni Bohol second district Board Member Jamie Aumentado Villamor nga magpanday og mga balaodnon aron mapauswag ang kinabuhi sa mga igsuong Bol-anon.
Kini iyang panan-aw nga adunay mas lig-on nga Bohol pinaagi sa iyang major legislative agenda nga mao ang pagpadali sa pag-uswag sa ekonomiya sa probinsya.
Gipadayag niya nga matuman lang kini pinaagi sa pagpalig-on sa komunidad aron makabaton og mas lig-on nga ekonomiya ang lalawigan sa Bohol.
Sa iyang inaugural speech atol sa ilang inaugural session sa 29th Sangguniang Panlalawigan sa nakalabay nga martes Hulyo 5, gi-awhag niya ang iyang mga kauban sa paghimo sa mga lakang sa lehislatibo aron matabangan ang mga mag-uuma, negosyante, mananagat ug tribo.
Sa wala pa mamahimong board member si Villamor, siya nahimong legislative consultant sa House of the Representatives ug corporate board secretary sa National Irrigation Administration.
Nunot niini, nakaangkon siya sa kahibalo, kahanas, pagbansay ug kasinatian nga mapaambit karon isip magbabalaod sa Sangguniang Panlalawigan sa Bohol. (RTB)
