ADUNAY nabantayan nga grupo o mga grupo sa mga batan-on nga naglibot-libot sa siyudad sa Tagbilaran ug sa mga kalungsoran sa Bohol nga nagsul-ob og sotana.
Kini ang nasayran ning pamantalaan gikan ni Bishop Alberto ‘Abet’ Uy sa Diyosesis sa Tagbilaran.
Matud pa sa Obispo nga nananghid kuno kini sila sa mga kadagkoan sa lungsod ug sa kapulisan nga magsuroy-suroy sa kabalayan.
Giklaro ni Bishop Abet nga ang pagpangayo nila og tabang gikan sa mga tawo iyang girespeto, ug dili niya tuyo ang pagpana-ut sa ilang gibuhat kay bisan siya tigpangayo man usab og tabang.
Buot lamang sa Obispo nga ipahibalo nga kining maong mga grupo dili iya sa seminary sa Taloto ning syudad o sa Diyosesis.
Gipasabot ni Bishop Abet nga ang ilang pagpangayo og hinabang alang sa seminaryo ipahigayon lamang atol sa tinuig nga Parish Aid.
Nanghinaut ang opisyal sa simbahan nga kining maong pagpatin-aw makagiya sa tanan nga nangutana mahitungod niini. (RTB)
