NISAKA ang ihap sa mga kaso sa dengue sa Bohol ngadto sa 1049 porsyento sa unang bahin sa tuig 2022 kumpara sa samang panahon sa miaging tuig sumala sa datos gikan sa Provincial Health Office (PHO).
Ang ihap sa sakit nga dala sa lamok nisaka ngadto sa 1,230 ka kaso gikan sa Enero 1 hangtod Hulyo 3 ning tuiga gikan sa 107 sa samang panahon niadtong 2021.
Natala usab sa probinsya ang labing una nga pagkamatay sa dengue karong tuiga, matod ni Provincial Health Office (PHO) chief Dr. Yul Lopez.
Niingon si Lopez nga usa ka singko anyos nga batang babaye ang namatay sa komplikasyon gumikan sa maong sakit sa Governor Celestino Gallares Memorial Hospital sa Tagbilaran City niadtong Miyerkules sa kadlawon, Hulyo 6, 2022.
Sigon niiini nga nag bleeding ang bata hinungdan sa iyang kamatayon diin makaguba kini sa mga kaugatan sa tibuok lawas maong sa higayon nga maguba, angdugo ug tubig sa lawas mo gawas hinungdan sa grabeng dehydration ug shock.
Subay niini, giawhag ni Lopez ang publiko sa pag-obserbar sa “high index of suspicion,” buot ipasabot ang mga ginikanan o guardian kinahanglang magpatambal kon ang hilanat sa ilang anak molungtad og kapin sa duha ka adlaw.
Iyang namatikdan nga kadaghanan sa mga nangamatay sa dengue kasagaran tungod sa pagka-ulahi sa pagpaospital sa mga pasyente.
Matod ni Lopez, gipakatap sa PHO ang tanang dengue coordinator niini aron mopahigayon og massive information drive nga magpahinumdom sa publiko sa pag-obserbar sa maayong hygiene ug sanitation aron malikayan ang pagkaylap sa dengue.
Siya niingon nga daling masumpo ang dengue infections kon ang mga komunidad mag-obserbar sa preventive measures sama sa 4S, ang estratehiya sa health department batok sa pagkaylap sa maong sakit.
Ang plano sa 4S naglakip sa pagpangita ug pagguba sa mga lugar nga gipasanay sa lamok, pagsiguro sa pagpanalipod sa kaugalingon, pagpangita og sayo nga konsultasyon, ug pagsuporta sa fogging ug pag-spray sa mga hotspot nga lugar. (RTB)
