PABOR ang bag-ong napili nga konsehal sa syudad sa Tagbilaran kinsa mao ang kanhi pangulo sa Liga ng mga Barangay (LNB) sa syudad, nga ma-oktaba ang barangay ug Sangguniang Kabataan elections gikan sa Disyembre 5, 2022 ngadto na sa sunod tuig 2023.
Kini ang gibutyag ning pamantalaan ni Konsehal Ody Glovasa kagahapon human sa ilang inaugural session kauban sa bag-ong mayor nga si Jane Yap ug bise-mayor Adam Jala.
Sumala ni Glovasa nga kini aron mahatagan og igong panahon ang nasudnong kagamhanan sa pagpangandam sa maong piniliay ilabi na kay hinay hinay pa nga nibangon ang nasud gikan sa nasinate nga pandemya.
Dako usab ang pasalamat ni Glovasa sa tanang katawhan sa syudad nga misuporta kaniya sa nakalabay nga piniliay ug naghimo kaniya nga regular member sa Sangguniang Panlungsod.
Sa nasayran giduso sa kongreso ang pag-oktaba niini pinaagi sa Republic Act 11462 nga giapbrobahan usab ni kanhi Presidente Rodrigo Roa Duterte.
Samtang sa pikas bahin, labing maayo nga huwaton ug agdon ra ang mahimong hukom ni Presidente Bongbong Marcos kalabot sa sugyot sa ubang magbabalaod nga iuswag sa laing tuig ang 2022 barangay elections. Kini maoy komento ni Mayor Jane Yap kalabot sa nitumaw nga sugyot.
Apan si Yap nitataw nga ang tingog sa presidente maoy angayan nga paaboton ug posibleng mahisgotan kini niya sa iyang State of the Nation Address (SONA).
Gitug-an ni Yap nga nagkalain-lain ang reaksyon sa ubang mga kapitan kalabot sa maong butang, apan ang tanan mosubay ra gyud sa makab-ot nga desisyon sa presidente.
Sa social media, nagkalain -lain ang reaksyon sa netizens, ang uban dili uyon nga iuswag ang eleksyon sa barangay gumikan kay mas motaas ang ilang pag-antos sa mga opisyal nga wala gyud naglihok.
Duna pu’y uban niingon nga ang mga magbabalaod nga mahadlok makagasto maoy gustong iuswag ang piniliay. (RTB)
