GIBUTYAG sa bag-ong napiling mayor sa Lungsod sa Valencia nga si Bro. Dionisio Neil A. Balite, Ph.D ang 4Ps sa pagpangalagad nga dili angay kalimtan.
Mao kini ang, “Pagminanahalay, Pag-respetohay, Pagtinabangay ug Pag-Ampo.”.
Kahinumduman nga si Mayor Balite ang nipilde sa niaging piniliay sa duha pa ka mga kandidato nga sila Barney Balingkit ug Ella Garcia nga ig-agaw sa kanhi mayor nga si Katrina Lim.
Si Lim ang gipilde pagka kongresista ni reelectionist 3rd district Congw. Alexie Tutor.
Ang kasamtangang mayor maoy maguwang sa bag-ong napili nga bise gobernador nga si Dionisio Victor A. Balite, Ph.D.
Ang ilang amahan nga si Atty. Dionisio D. Balite, Ph.D nahimong bise gobernador kaniadto sa tuig 2016-2019.
Atol sa iyang inauguration rites, gipahinumduman ni Congw. Tutor si Mayor Balite nga dili kalimtan ang mga saad sa katawhan nga ilang pagatumanon bisan pa man sa mga suliran nga giatubang. (Kahlil Lester O. Camba)
