NAGPASALAMAT si Mayor Rene Borenaga sa Bien Unido sa suporta nga gihatag sa iyahang pamilya ug labi na sa katawhan sa lungsod, apil na sa panghinaut nga ang iyang ikaduhang termino, buligan unta sa maayong panahon.
Didto atul sa hiniusang pagpanumpa sa katungdanan sa mga bag-ong napili nga opisyales sa lungsod, nanawagan gihapon ni Borenaga sa pagtinabangay ug panaghiusa alang sa dugang pa nga kalamboan sa lungsod.
Kahinumduman nga ang unang termino ni Mayor Borenaga, gimantsahan sa mga panghitabo nga dili kalikayan.
Gawas nga usa sa mga unang lungsod nga gisamok sa coronavirus disease (COVID) niadtong sayo sa 2020, halos mahurot gyud ang pinansyal nga kahinguhaan sa lungsod aron may ikapaambit nga hinabang sa mga biktima sa mananakod nga sakit, ilabi na sa mga isla nga barangay nga lisud ang pagpatabok sa serbisyo medical alang sa mga masakit.
Igo nga nakaluag-luag sa kalisud dala sa pagpugong sa pag-takod sa sakit, ang Bien Unido usa sa mga lungsod sa Bohol nga grabe ang pagkabanlas tungod sa hangin, uwan ug tidal surge nga dala sa bagyong Odette.
Mismo ang numero uno nga economic enterprise sa lungsod nga mao ang dive camp, wala makaipsot sa lampurnas sa bagyo.
Hinuon, dala sa pagdaginot ug manggi-alamon nga pagpahat-pahat sa tinubdan sa kahinguhaan sa lungsod, hinay na nga naningkamot ang lungsod nga makabarug og usab.
Usa ka bag-ong sinugdan ang gilauman sa mayor ug sa mga bag-ong napili nga opisyales.
Gihimo ang Oath taking ceremony sa mga nasampit nga napiling opisyales uban ni re-elected Municipal Mayor Rene B. Borenaga, Re-elected Municipal Councilors Hon. Procopio Macua Jr.
Nahadungan usab sa pagpanumpa any mga bag-ong sampa nga mga konsehales nga sila si Leonaria A. Atillo, Jocelyn Villarias ug Rosemarie A. Boniel
Nanumpa sila atubangan sa ilang mga gimahal nga banay ug ni Judge Azucena Macalolot-Credo, Executive and Presiding Judge, RTC 101, Talibon, Bohol. (MPIO M. ITEM/PIABohol)
