NIMUGNA si Gobernador Aris Aumentado og buhatan nga mosusi sa giingong anomalosong mga transaksyon nga nahitabo sa miaging administrasyon ubos ni kanhi gobernador Art Yap sa tinguha nga matuman ang iyang saad sa kampanya nga limpyo nga pagdumala.
Diha-diha dayon human sa iyang inagurasyon niadtong Huwebes, Hunyo 30 gipirmahan ni Aumentado ang Executive Order (EO) No. 2 nga nagtukod sa Office of Governance Accountability and Review (OGAR), nga ubos sa Office of the Governor.
“Let us leave the bitterness of the election campaign behind us but it does not mean that accounting of wrongful past provincial government acts will be swept under the rug of fatal indifference and false reconciliation,” matod ni Aumentado sa iyang pakigpulong.
Ang OGAR pangunahan ni kanhi Cabinet Secretary ug presidential adviser Leoncio Evasco, Jr. nga nagpadayon pa ang konsultasyon aron mailhan ang mga abogado ug uban pang personahi nga maglangkob sa team.
Matod ni Aumentado, ang inisyatiba kabahin sa paningkamot sa iyang administrasyon sa pagpangita sa hustisya alang sa mga Bol-anon ug dili kini panimalos sa politika.
“We are not out on a witch hunting, we are on a cleanup drive. Corrupt practices that laid to waste our meager resources and deprived hungry mouths of food or ailing bodies of relief are not mine to forgive or forget. It is the entire Boholano people that are wronged. It is they who cry for redress. Let justice be done though the heavens fall,” dugang niya.
Sumala sa gilatid sa EO 2, ang OGAR moila ug mosusi sa mga transaksyon o mga buhat nga posibleng nakalapas sa Anti-Graft and Corrupt Practices Act (Republic Act 3019) ug sa Code of Conduct and Ethical Standards for Government Officials and Employees (Republic Act 6713).
Uban sa operational nga suporta gikan sa Provincial Legal Office, ang OGAR pagatugutan sa pag-access sa tanang rekord sa kagamhanang probinsiyal.
Naporma ang OGAR taliwala sa mga alegasyon sa kurapsyon batok sa miaging administrasyon ubos ni Yap kinsa nag-atubang og duha ka reklamo sa Office of the Ombudsman tungod sa mga kalapasan batok sa RA 3019.
Ang duha ka mga reklamo gisang-at batok kaniya tungod sa giingong anomalosong mga transaksyon nga nahitabo samtang siya gobernador. (RTB)
