Ni Wilson Auguis Subrio
TAGBILARAN CITY, Bohol (Hunyo 30) — Kini ang dulot sa kasing-kasing nga mensahe-panumpa ni Gob. Aris Aumentado sa iyang inaugural address didto sa Bohol Cultural Center atol sa iyang pagpanumpa sa dakong katungdanan kauban ni Bise-Gob. Dionisio Victor Balite ug mga napiling bokal ug mga kongresista sa tulo (3) ka mga distrito.
Ang maong mga pulong gihulman ni Aris gikan sa katapusang linya sa “Awit sa Bohol”.
Si Aris nanumpa atubangan ni Supreme Court Associate Justice Henri Jean Paul Inting kauban ang iyang mga sakop sa pamilya.
“Abante Bohol: Limpyong Pang-Gobyerno, Kalamboan sa Tanang Bol-anon” ang tema sa maong “The Inaugural”.
Ang maong Inauguration Ceremonies giunhan sa usa ka Inaugural Mass sa St. Joseph the Worker Cathedral-Parish sa siyudad sayu sa buntag.
Daghang mga nindot nga programa ug proyekto ang giandam si Gob. Aumentado alang sa dayag nga kalambuan ug kauswagan sa Bohol ug sa katawhang Bol-anon.
Ang tubig ug kuryente nga iyang gisaad panahon sa pagpangampanya nga himuong duha (2) ka haligi sa kalamboan maoy unahon nga pangitaan og kasulbaran ni Gob. Aris kay iyang nakita nga kini ang kuwang sa Bohol sa dugay ng panahon.
Ang sektor sa agrikultura, edukasyon, heritage, panginabuhian, trabaho, imprastraktura, panglawas ug ubang mga sektor nga naapektuhan sa pandemya sa COVID-19 ug sa Bagyong Odette buhion ug suportahan og ayo sa iyang administrasyon.
Ang isyu ni “Ivan” kinsa nangutong og matud pa P50 matag kubiko sa mga quarry operators, kabahin sa iyang paphaon isip paghinlo sa mga korapsyon nga nahitabo sa Kapitolyo sa panahon sa administrasyong Yap.
Atuabangan sa mga lider sa politika sa Bohol nga nitambong sa maong mahinungdanong adlaw, niingon si Aris nga maghimo siya og usa ka grupo nga maoy mo-susi ug mo-imbestigar sa tanang giingong iregularidad sa Kapitolyo panahon ni kanhi Gob. Art Yap, aron makabaton og hustisya ang katawhang Bol-anon.
Gihinumdom usab sa anak nga Aumentado ang mga nahimo ni kanhi Presidente Carlos P. Garcia ug ang iyang amahan, kanhi Gob. Erico Boyles Aumentado.
Samtang gihatagan usab og gibug-aton sa kanhi magbabalaod sa Segundo Distrito ang “pagtahod ug pagpanalipod” sa kamatuoran ug kini iyang gipahinumdom sa mga sakop sa media.
Matud ni Aris nga “welcome usab ang tanang sakop sa media” sa Kapitolyo sa katawhan. Walay pili-pili.
Nisaad si Aumentado nga iyang tumanon ang duha ka butang mga iyang gisulti panahon sa kampanya: “Limpyong pang-Gobyerno ug Unahon ang Interes sa mga Bol-anon.”
Ang maong pagpanumpa gihuman ni Aris pinaagi sa pagpirma sa upat (4) niya ka mga Executive Orders (EOs) ug usa (1) ka Memorandum nga mao ang mga mosunod:
Executive Order No. 1. “Establishing the Bohol Economic Recovery Task Force” pagadumalaon ni Provincial Administrator Asteria C. Caberte.
Executive Order No. 2 “Establishing the Office of Governance Accountability and Review” pangunahan ni kanhi CabSec Jun Evasco Jr.
Ang maong Buhatan maoy mo-susi og mohimo’g patas nga imbestigasyon sa mga aktibidades sa Kapitolyo sa niaging liderato.
Una ng gibutyag ni Aris nga si Evasco Jr. kinsa naparot ni Yap kaniadtong 2019 pagka-gobernador anaay “espesyal nga trabaho” sa iyang administrasyon.
Executive Order No. 3 “Establishing the Development Agenda and Creating its Focus and Tracking Group” pangulohan usab ni PA Asteria C. Caberte.
Executive Order No. 4 “Extending for a Period of 30 Days Specific Job Orders and Casual Workers, Plantilla Employees, and those Engaged under Contract of Services Performing Critical and Technical Functions”.
Ug Memorandum Order No. 3 “Appointment of Chairperson and Members of the Development Agenda Focus and Tracking Group”.
Sa iyang nubong pakighinabi sa katawhan sulod sa Kapitolyo, mao kini ang mensahe ni Gob. Aumentado sa mga empleyado: “Wala mo’y kahadlukan kon kamo walay gihimong binuang sa kaban sa katawhan”.
“Nahibalik karong adlawa ang garbo sa mga Bol-anon,” dugang ni Aris.
Sa gihimong mubo nga press conference, gitubag sa bag-ong gobernador ang mga isyu nga gipangutana sa mga sakop sa media.
Gitak-upan sa hingpit ang maong inagurasyon pinaagi sa gihimong “Abante Bohol Business Dialogue” nga gipanguhan ni Aris sa Modala Beach Resort sa Panglao kauban ang mga personalidad nga magpapatigayon ug lider sa industriya sulod ug gawas sa Bohol.
Ang maong Business Dialogue gitambungan sa mga representante sa mga kompanya sama sa Philippine AirAsia, Robinsons Land, HGS Healthcare, VG Puyat Group of Companies, ug RDAK Group of Companies/Harley Davidson Cebu ug uban pa.
Nipasalamat ang bag-ong Gobernador sa katawhan nga nibarog alang kaniya.
Si Aris nanawagan usab sa mga lider ug sa katawhan nga suportahan ang iyang administrasyon ug magmove-on na kay nahuman na ang Eleksyon.
Nitambong sa maong importanteng adlaw si Evasco, ang negosyanteng si Willy Ramasola kinsa maoy numero-unong kritiko ni Yap ug tsirman sa ABAKA-Bohol nga si Norris Oculam.
Ang anak nga Aumentado maoy ika-27 nga Gobernador sa probinsya sa Bohol.
