BANHAWON pagbalik sa ikaduhang labing-taas nga opisyal sa Bohol ang isyu nga naglambigit sa usa ka Ivan human kini gipatay sa nakalabay nga Sangguniang Panlalawigan (SP) nga gipamunuan sa napildi nga si kanhi bise-gobernador Rene Relampagos.
Si Dr. Dionisio Victor A. Balite, Ph.D kinsa midagan ug midaug pagka bise-gobernador pinaagi sa anti-corruption platform mipasalig usab sa publiko alang sa limpyo ug transparent nga pagdumala sa SP.
Miingon si Balite nga ubos nila ni Gov. Aris Aumentado wala na unyay pag-bypass sa normal nga pamaagi sa bidding ug wala nay mga transaksiyon nga himuon o ipaagi sa mga tawo nga walay opisyal nga gimbuhaton sa Kapitolyo.
Ang pamahayag usa ka dayag nga paghisgot sa usa ka tawo nga giila lang sa ngalan nga “Ivan” nga giingong nangolekta og dagkong mga kickback gikan sa mga quarry operator sa panahon sa administrasyon ni Yap ug Relampagos.
Sumala ni Balite nga si Ivan nangayo og P50 matag metro kubiko nga anapog sa mga quarry operator sa Bohol bugti sa pag-aprobar sa ilang quarry applications.
Nasubo ang bise-gobernador kay ang mga Bol-anong magpatigayon dili na hinuon makasulod og negosyo sa Kapitolyo tungod sa mga babag sama sa gibalita nga pag pangayo og dagko nga kickback.
Gipasalig ni Balite nga ablihan ang mga pultahan sa negosyo sa Kapitolyo alang sa mga Boholano mismo nga nakapasar ug nagbaton sa mga batakang katakus ug gusto usab nga mohimo sa ilang bahin sa pagtukod niini nga lalawigan. (RTB)
