SA AKONG nadungog kaniadtong Huwebes atol sa “The Inaugural” nga mao ang sinugdanan sa dakong trabaho ug responsibilidad ni Gob. Aris Aumentado isip amahan sa mga Bol-anon, nituhop sa akong kasing-kasing ug nidulot sa akong kabukugan ang iyang mensahe-panumpa.
“…Ihalad ko, lawas ug kalag, sa mutya kong Bohol,” linya nga iyang gihubit gikan sa katapusang bahin sa Awit sa Bohol.
“Karong adlawa nahibalik ang garbo ug dungog sa mga Bol-anon kay nanumpa ug nagtindog sa inyong atubangan karon ang usa ka tinuod na Bol-anon sa dugo, sa kasing-kasing ug sa buhat,” dugang pa ni Gob. Aumentado.
Nipagakpak kaniya ang mga nitambong sa maong mahinungdanong kalihukan nga gihimo sa Bohol Cultural Center.
Mga sakop sa iyang pamilya, mga politiko, mga negosyante, sakop sa media ug mga dumadapig ang nisaksi sa gibuhiang mga bulawanong pamulong ni Aris.
Gidunyang usab sa anak nga Aumentado ang iyang mga programa ug proyekto ug una sa listahan ang tubig ug kuryente nga maoy iyang nakitang agianan sa kalambuan sa Bohol.
Gipunto ni Aris nga ang Bohol iya na sa mga Bol-anon ug dawat ang tanan sa Kapitolyo sa katawhan.
“Welcome mo sa inyo, atong Kapitolyo,” ni Gob. Aumentado pa.
Gidayeg si Aris tungod sa iyang pagkayano apan maabi-abihon ug sa kalig-on sa baruganan nga puy-an ang sakto ug makatarunganon.
Seryoso usab ang direksyon ni Aris nga mahinloan ang Kapitolyo kon unsa may mga hugaw nga nabuhat o gibilin sa nakalabay nga pamunoan, kay kini alang man sa kaayuhan sa tanang Bol-anon.
Gani, tema sa maong aktibidad “Abante Bohol: Limpyong pang-Gobyerno, Kalamboan sa Tanang Bol-anon”.
Nibilib usab ang katawhan sa kakugi ni Aris nga ni-imbitar og mga dagkong negosyante aron mobubo sa ilang kuwarta sa Bohol aron makamugna og daghang opportunidad.
Sa usa ka ABante Bohol Business Dialogue nga gihimo sa Modala Beach Resort sa Panglao, daghang mga inilang mga magpapatigayon ang nitambong sulod ug gawas sa Bohol lakip na ang mga langyaw nga mga negosyante gawas sa nasud.
Ana-a usab ang istorya nga daghang nalipay nga si Aris ang nidaug kay iyang giablihan ang Bohol alang sa pagrekober sa ekonomiya nga nahagba sa pandemya sa COVID-19 ug sa Bagyong Odette.
Nganong nalipay man? Kay matud pa, sa niaging administrasyon daghan ang reklamo gikan sa mga investors nga “mangayo” kuno daan una sila makasulod sa Bohol.
Ang maong kalihukan nga akong natambungan magpabilin na sa dughan ug panumduman ang maayong kasinatian, nga mapatik sa kasaysayan.
Congrats, Gob. Aris, Kongresista Van-Van Aumentado, Board Members Atty. Tommy Abapo Jr. ug Atty. Jami Aumentado Villamor ug sa tanang nanumpa sa ilang katungdanan! Abante Bohol! Mabuhi ang kaliwat Bol-anon!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
