USA ka hagit sa matag local government unit (LGU), barangay o siyudad, ang maayong pagkolekta sa basura matag adlaw.
Kini ang paghulagway sa bag-ong bise-gobernador sa Bohol subay usab sa komentaryo sa Department of Interior and Local Government (DILG) nga magsugod sa barangay ang epektibo nga koleksyon sa mga basura.
Nagkanayon si Dr. Dionisio Victor Balite, Ph.D nga sagad sa mga barangay sa Bohol walay garbage truck nga magamit sa paghakot sa ilang mga basura gikan sa ilang tagsa-tagsa ka lugar paingon na sa gitagana nga mga material recovery facilities (MRF) sa kalungsuran.
Si Balite masaligon nga sa bag-ong administrasyon sa kapitolyo kauban siya, aduna unyay suporta sa mga barangay kalabot sa paghipos sa mga basura.
Nalipay usab si Balite kay ang mga katawhan sa tibook Bohol mihimo na sa pagbahig-bahig (segregate) daan sa mga basura aron dili na mahasol ang mga basurero panahon sa pagkolekta niini pinasubay sa RA 9003 kon sa Ecological Solid Management Act.
Nanawagan usab si vice-gov. elect Balite sa tanang Bol-anon nga manglimpyo kanunay sa panimalay aron makalikay sa mga sakit nga dala sa kahugaw sa palibot. (RTB)
