MULINGKOD si outgoing Mayor Baba Yap isip bag-ong City Administrator sa kagamhanan sa Tagbilaran.
Kini nasayran human opisyal kini nga gipahibawo sa bag-ong napiling mayor sa siyudad, Jane Yap atol sa gipahigayong City Executive Advisory Council meeting nga gipangulohan sa mayor elect karong bag-o.
Gitambongan ang tigum sa nagkadaiyang hepe sa mga buhatan sa kagamhanan sa siyudad ug sa mga hepe sa mga national offices ug kini gipahigayon sa City Tourism Information Center.
Nasayran gikan ni Dice Arsenal, ang City Tourism Officer sa siyudad nga atol sa kalihokan gianunsiyo ni incoming mayor Jane Yap nga ang iyang kapikas nga si outgoing mayor Baba maoy molingkod nga city administrator sugod sa Hulyo 1 ning tuiga hulip ni Kathy Torremocha.
Una nang gipadayag ni mayor Baba Yap nga bisan mahuman na ang iyamg termino apan anaa gihapon siya moabag sa iyang kapikas nga mao nay mopuli kaniya sa pagka mayor sa Tagbilaran.
Mas pabor si mayor Baba nga tawgon og “First Gentleboy’ kay matod pa mas cute ang dating imbes nga tawgon og First Gentleman. (RTB)
