NAGKANAYON ang direktor sa Land Transportation Office (LTO)-7 Victor Caindec nga gikinahanglan ang pagtinabangay sa dealers ug sa mga tag-iya og sakyanan ug motorsiklo aron kining isyu sa distribusyon sa plaka maresolba.
Gihulagway ni Caindec ang labing efficient nga pamaagi sa pag-distribute sa mga plaka nga moagi sa dealer kini tungod kay sila man ang namaligya sa sakyanan ug motorsiklo.
Gipasabot ni Caindec nga aduna sila’y nadawat nga memorandum gikan sa ilahang ulohang buhatan sa niaging tuig nga kun dili ma-liquidate sa dealer ang mga plaka dili usab sila hatagan sa bag-ong set sa mga plaka.
Ang problema sa plaka accountable item kini ug kong wala ma-liquidate ug dili usab ma-establisar og sakto nga nadawat ngadto sa kliyente sa dealers ang ilang mga plaka magproblema matud sa LTO kay basin og maadto kini sa laing mga kamot.
Aron maresolbar ang maong problema ang LTO-7 nihimo og laing sestema nga mao ang “walk in system” sama sa ilang gibuhat sa SM Seaside City Cebu nga giabalihan niadtong buwan sa Enero tuig 2020 ug ang paghatud sa mga plaka sa ubang bahin sa rehitun sama sa Tagbilaran City dinhi sa Bohol.
Apan bisan og duha ka tuig na kini nga nag-operate base sa daily monitoring sa LTO-7 kada adlaw naa lang sa 10 ngadto sa 20 ka plaka ang makuha.
Gikan sa pag-abli sa maong walk in system sa LTO sa naasoy nga mall ang na-release nga plaka sa Hunyo 10, 2022 anaa sa 12, 640 sa four-wheels vehicle samtang sa motorsiklo naa ra sa 10,600.
Ang kuhaonon sa motorcycle plates anaa sa kapin 400,000 ug sa motor-vehicles sobra sa 100,000 ka plaka ang kuhaonon.
Matud ni Caindec nga sa ubang rehiyon maong nisaka ang ilang plate claim index gumikan kay gialarma nila ang mga sakyanan nga anaa na ang plaka apan wala kuhaa sa tag-iya.
Kasagaran sa plaka nga anaa sa karon sa storage sa LTO-7 gikan kini sa 2018, 2019, 2020, 2021 ug 2022. (RTB)
